Ólafur Ragnar Grímsson, forseti Íslands, skartaði forláta gulu bindi með litlum fílum á þegar hann tilkynnti að hann hygðist bjóða sig fram að nýju í embætti forseta. Óhætt er að segja að bindið hafi vakið mikla athygli, en DV fjallaði meðal annars um það.

En hvaða kemur bindið? Ólafur segir frá því í Fréttablaðinu í dag að bindið hafi hann fengið að gjöf frá Dorrit. „Bindið er í uppáhaldi hjá mér, ég ef notað það oft,“ segir Ólafur Ragnar í Fréttablaðinu.

Dorrit er vel þekkt fyrir fágaðan og flottan smekk og hefur til að mynda verið valin best klædda kona landsins. Hún veit greinilega hvað klæðir sinn mann.

Fréttablaðið ræðir einnig við Kristin Árna Lór Hróbjartsson, áhugamann um tísku, um bindið. „Ég veit ekki alveg hvaðan fíllinn kemur, ég þekki þetta bindi ekki beint persónulega, en þetta er mjög áhugavert bindi. Í fyrsta lagi í stjórnmálum vísar fíllinn oft til repúblíkanahópsins, sem er algjör andstæða við það sem Ólafur Ragnar stendur fyrir, þar sem hann er ekki hægri íhaldsmaður. Svo er spurning hvort hann sé að tengja sig við bleika fílinn í herberginu,“ segir Kristinn sem bætir við að guli liturinn sé „dipló“. Þá bætir hann við Ólafur sé mikið fyrir bresk föt og trúr sínum stíl, til að mynda kaupi hann öll sín jakkaföt á Savile Row í Bretlandi.