Hafa vart sést síðan á tíunda áratugnum – Íþróttavöruverslun í Hafnarfirði farin að selja á ný
Nú gæti fortíðarþráin farið um stóran hóp fólks sem kominn var til vits og ára á fyrri hluta tíunda áratugar síðustu aldar þegar NBA-körfuboltamyndaæðið reið yfir landið. Íþróttavöruverslunin Músík og Sport í Hafnarfirði ákvað nefnilega nýverið að hefja aftur sölu á körfuboltamyndum sem höfðu vart sést í verslunum hér á landi í ein 20 ár. Bríet Pétursdóttir, eigandi verslunarinnar, segir að nokkur eftirspurn hafi verið meðal yngri kynslóðar körfuknattleiksáhugafólks.
„Við vorum auðvitað með þetta hérna fyrir 20–25 árum eins og flestir og það var heilmikil sala, en þetta er í fyrsta skipti síðan þá sem við bjóðum upp á körfuboltamyndir,“ segir Bríet í samtali við DV, en hún hefur verið eigandi verslunarinnar í þrettán ár og var þar áður með verslun austur á landi og man vel þegar körfuboltamyndir seldust í bílförmum.
„Þá var maður með 10–15 mismunandi tegundir af kössum í sölu en það verður gaman að sjá hvernig þetta þróast. Það er alltaf annað slagið spurt út í körfuboltamyndir. Það hefur auðvitað verið minni áhugi á þeim en fótboltanum en þeir eru alltaf voða ósáttir þessir krakkar sem fá ekki myndir sem hæfa sinni íþrótt.“
Bríet segir að hún sé með þrjár mismunandi gerðir núna og að búast megi við að minnsta kosti ein tegundin veki ekki síður lukku hjá hinum fullorðnu með fortíðarþrá en ungu kynslóðinni.
Aðspurð kveðst hún ekki vita hvort fleiri verslanir séu enn, eða aftur, farnar að selja NBA-körfuboltamyndir en segir að hún flytji þær ekki inn sjálf. „Það er því bara að sjá hvort aðrir taki við sér líka og verður gaman að sjá hvernig salan verður.“
Ljóst er að enn er áhugi á körfuboltamyndum, einnig meðal ákveðins hóps fullorðinna. Í fyrra var stofnaður Facebook-hópurinn NBA Körfuboltamyndir – kaupa, selja, skipta þar sem hátt í sjö hundruð manns deila safni sínu með öðrum og gamlar og góðar myndir ganga kaupum og sölum.
