Steinar Berg fyrrverandi útgefandi Bubba og Egó sakar Bubba um að gera tilraun til að sverta mannorð sitt. Harðar ásakanir hafa gengið á milli þeirra í dag. Pressan greinir frá. Steinar ákvað að tjá sig eftir að hafa horft á þáttinn Popp- og rokksaga Íslands. Þar segir Bubbi útgáfufyrirtæki Steinars hafa grætt óeðlilega mikið á plötum Egó og hljómsveitarmeðlimir séð lítið af þeim aurum.
Segir Steinar þetta vera alrangt. Plöturnar hafi selst í rúmum 5000 eintökum og hljómsveitin fengið sitt. Þá hafi hann staðið þétt við bakið á sveitinni en hún hafi hætt vegna ágreinings sem hafi verið Bubba að kenna. Bubbi svarar og segir:
„Samningar voru ömurlegir, þú varst í yfirburðastöðu og nýttir þér hana. Prósentur segja helling og listamaðurinn hafði enga yfirsýn yfir neitt. Við höfðum enga endurskoðendur, enga lögfræðinga, vissum ekki neitt, heldur tókum því sem sagt var. Að halda því fram að enginn hagnaður hafi verið af þessum plötum er í besta falli útúrsnúningur.“
Steinar svarar Bubba og segir:
„Þú ert greinilega alveg búinn að afbaka það sem raunverulega átti sér stað í fórnarlambsþránni sem heltekur þig.“
Þá segir Bubbi að prósenturnar hafi verið lágar og fyrirtækið nýtt sér reynsluleysi hljómsveitarmeðlina. Þeir hafi skrifað undir vegna þess að þá hafi langað að gera plötur.
Steinar Berg svarar:
„Bubbi. Þú kemst ekki upp með að fullyrða svona. Fyrirtæki mitt skilaði aldrei hagnaði af nýjum íslenskum útgáfum, ekki eitt einasta rekstrarár, heldur hélt sér á floti með innflutningi platna. Þú ert einfaldlega að reyna að sverta mig og mitt mannorð með órökstuddum dylgjum.
