Tónlistarmaðurinn Ólafur Arnalds hefur ferðast um allan heim á undanförnum árum. Til marks um það þurfti hann að sækja um nýtt vegabréf á dögunum þar sem allar síðurnar voru orðnar fullar. Eftir öll þessi ferðalög segir Ólafur að „það sé ekki vottur af rasisma“ í honum.

Ólafur segir frá þessu í viðtali við Ske þar sem hann ræðir allt milli himins og jarðar, meðal annars flakkið sem hann hefur verið á á síðustu árum. Þegar hann er spurður hvort sýn hans á Íslandi breyst eftir öll ferðalögin, segir Ólafur:

„Já, maður upplifir smæð Íslands mjög sterkt í dag. Vandamálin hér eru fremur lítilvæg í samanburði við þau vandamál sem aðrir glíma við. Svo sér maður líka hversu einangruð við erum og hversu miklir rasistar við getum verið. Það er ekki vottur af rasisma eftir í mér eftir að hafa ferðast svona víða. Maður hefur séð svo mikið og veit að fólk er eins mismunandi og það er margt. Kynþáttur er bara pólitískt hugtak sem var fundið upp á 19. öldinni,“ segir Ólafur.

Ummæli hans um hvað hann vill gera við rasista, eða öllu heldur fyrir þá, vekja athygli. „Ég mundi vilja stofna ferðasjóð handa rasistum; í hvert skipti sem samfélagið kæmist í tæri við rasista ætti að senda viðkomandi í heimsreisu: „Hér er ein milljón í íslenskum krónum: Farðu í heimsreisu og hættu þessu!. Samfélagið yrði miklu betra: Minningarsjóður Ólafs Arnalds.“
Sem fyrr segir hefur Ólafur ferðast víða, svo víða að hann þurfti að sækja um nýtt vegabréf þar sem allar síðurnar voru útfylltar.

„Það eru ekki mörg lönd eftir á listanum. Ég á reyndar Miðausturlöndin eftir og Afríku. Draumurinn er að ferðast til Írak eða Íran. Þetta eru einir af þeim fáum stöðum sem ég hef virkilega reynt að heimsækja. Ég hef unnið í því að fara til Íran í þrjú ár. Samkvæmt tölfræðinni á Facebook er stór hluti aðdáenda minna frá Íran – sem kemur á óvart. En ég hef komið til flestra landa í Evrópu, Asíu og Ameríku,“ segir Ólafur en athyglisvert viðtal við hann á vef Ske má nálgast í heild sinni hér.