„Ómægad, ég get ekki beðið!,“ segir hin 6 ára gamla Margrét Hekla þegar hún sér myndir af nýfæddri systur sinni en hún hafði í langan tíma beðið eftir komu hennar. Myndskeið sem sýnir viðbrögð hennar hefur vakið mikla lukku eftir að foreldrar hennar birtu það á Youtube á dögunum en það var tekið upp fyrir ári síðan.
Guðný Halla Hauksdóttir móður Heklu birtir myndbandið jafnframt á facebooksíðu sinni ásamt meðfylgjandi texta: „Fyrir einu ári síðan varð hún Margrét Hekla stóra systir. Það þarf varla að taka það fram að henni var búið að hlakka rosalega rosalega mikið til. Margrét er mjög tilfinningarík og þetta myndband endurspeglar það.“
„Þetta var langþráður draumur. Hún var búin að bíða í mörg ár eftir að fá lítið systkini. Þannig að eðlilega var spennufallið svolítið mikið þennan dag,“ segir Guðný jafnframt í samtali við DV.is og bætir við að þau foreldrarnir hafi ákveðið að birta myndbandið aftur í tilefni þess að yngri systir Margrétar Heklu, hún Vordís Katla varð eins árs á dögunum. Óhætt er að fullyrða að viðbrögð Margrétar muni koma til með að ylja mörgum um hjartarætur.
[youtube https://www.youtube.com/watch?v=0JHJay8FTVo&w=600&h=480]
