„Það er æðislegt að geta gefið tilbaka“
„Ég man bara hvað þetta var hræðilegt tímabil. Með þessu langar mig einfaldlega að gefa til baka.“ Þetta segir Ragnhildur Guðmundsdóttir sem stendur nú í ströngu við að safna gjafabréfum og gjöfum sem hún ætlar að koma áfram til barna og unglinga, á aldrinum 14-18 ára, og hafa verið innlögð eða munu dvelja á Barnaspítala Hringsins yfir jólahátíðina.
Ragnhildur sem er 21 árs greindist sjálf með hvítblæði þegar hún var 14 ára og þurfti að dvelja á spítala meira og minna í tvö ár.
„Ég veit hvernig það er að þurfa að vera á spítala og það er gríðarlega erfitt. Lítill pakki getur gefið svo mikla gleði og tekið hugann frá öllu erfiðinu og vanlíðaninni sem fylgir veikindunum. Maður hættir að pæla í þessu öllu því maður er svo glaður í augnablikinu.“
Þá segir Ragnhildur að það hafi reynt mikið á sálina þegar hún missti allt hárið og hún hafi oftar en einu sinni verið nær dauða en lífi.
„Þá var fólk eins og ég er að gera núna sem kom upp á spítala og var með eitthvað. Ekkert endilega eitthvað mikið. Það gladdi okkur svo svakalega mikið og hélt mér alveg gangandi þegar ég var uppi á spítala. Ég veit að ömmu og pabba fannst það líka rosalega gaman líka.“
Eins og staðan er í dag hafa 23 fyrirtæki gengið til liðs við Ragnhildi en gjöfunum verður komið til Styrktarfélags krabbameinssjúkra (SKB) barna rétt fyrir jól. Hún gerir ráð fyrir að í heildina fái um 30 börn glaðning fyrir jólin. Þau börn sem eru innlögð og dvelja á barnaspítalanum um jólin fá gjafirnar sínar sendar þangað.
„Ég hef verið að fara í fyrirtæki í matartímanum mínum í vinnunni, hringja í þau og senda póst til segja þeim frá því sem ég er að gera. Ég trúi ekki hvað þetta hefur gengið vel og hvað fólk tekur vel í þetta. Ég fæ gleðitár í augun þegar ég hugsa til þess hvað fólk er tilbúið að gera fyrir þessa krakka. Það er líka æðislegt að geta gefið til baka þar sem ég fékk sjálf mikinn stuðning í minni baráttu.“
Ragnhildur sem var sjálf virkur meðlimur í SKB segir að útlit sé fyrir að 8 börn og unglingar verði á spítalanum í meðferð yfir jólin. Það getur þó alltaf bæst í hópinn.
Þrátt fyrir að Ragnhildur hafi sjálf náð fullum bata segir hún að margir séu ekki jafn heppnir og hún.
„Það er svo margt annað sem getur spilað inn í veikindi hjá svona ungum einstaklingum. Til dæmis þunglyndi og kvíði. Líka þess vegna finnst mér svo mikilvægt að gera eitthvað fyrir þennan hóp af krökkum sem eru að berjast hetjulega fyrir lífi sínu.“
Þeir einstaklingar/fyrirtæki sem hafa áhuga á að leggja hönd á plóg við söfnunina geta sett sig í samband við Ragnhildi. Annað hvort í gegnum Facebook eða á rg18@simnet.is
