„Þeir aðilar sem voru á vakt þetta kvöld björguðu lífi barnsins okkar og fyrir það er ég ævinlega þakklát,“segir Alma Rut Lindudóttir en þriggja ára sonur hennar var hætt komin á fimmtudagskvöld þegar hann missti meðvitund og hætti að anda, Hún kveðst standa í ævilangri þakkarskuld við lögreglu og sjúkraflutningamenn sem björguðu lífi drengsins þetta kvöld, og segir mikilvægt að vakin sé athygli á því mikilvæga starfi sem lögregla og heilbrigðisstarfsfólk sinni á degi hverjum. Allt of oft sé athyglinni eingöngu beint að því neikvæða.

Alma á þrjá drengi, 15, 12 og 3 ára en yngsti sonurinn, Axel er greindur með ADEM, svokallaða bráða heila-og mænubólgu, en sá sjúkdómur er algengari hjá börnum en fullorðnum og getur komið í kjölfar veiru- eða bakteríusýkingar. Í tilfelli Axels kom sjúkdómurinn í kjölfar flensu nú í haust. Á fimmtudagskvöldið lögðust þau mæðgin til svefns um átta leytið en rúmlega klukkutíma síðar vakti sonur Ölmu hana.

„Stuttu síðar hætti hann að anda og datt út,“ segir Alma. Hún kveðst um leið hafa hlusta á innsæið og hringt á neyðarlínuna.

„Næstu mínútur eftir það voru það versta, skelfilegasta og erfiðasta sem ég hef nokkurn tímann upplifað. Þetta er auðvitað versta martröð allra foreldra, að horfa upp á barnið sitt í bráðri lífshættu og geta ekkert gert, heldur er maður algjörlega varnarlaus. Þarna er maður settur í þá stöðu að þurfa algjörlega að treysta á þá sem koma til bjargar, fólki sem maður þekkir ekki neitt og hefur aldrei séð áður,“

segir Alma þvínæst en það tók lögreglu og sjúkraflutningamenn aðeins rúmlega tvær mínútur að koma á staðinn.

„Það var algjörlega magnað hvað þau komu fljótt. Allt í einu var íbúðin orðin full af fólki, og allir einbeittu sér að því sama, að bjarga stráknum okkar.“

Alma bætir við að þarna hafi hver einasta sekúnda skipt máli. „Ef það hefðu liðið þó það væri ekki nema bara hálf mínúta í viðbót þá er óvíst hvort að barnið okkar væri á lífi í dag.“

Axel var í kjölfarið fluttur á sjúkrahús með hraði og lokaði lögregla fyrir umferð svo hægt væri að koma undir læknishendur sem fyrst. Hann er nú kominn úr öndunvarvél og að sögn Ölmu virðist hann ætla að komast klakklaust frá þessari raun.

Axel Freyr Hafsteinsson 3 ára.

„Fólk ætti að vita hvað við erum ótrúlega heppin hér á landi að eiga allt þetta magnaða fólk sem vinnur innan lögreglunnar og á sjúkrahúsunum,“ bætir Alma við og tekur undir að þeir aðilar eigi svo sannarlega hrós skilið fyrir að vinnu óeigingjarnt og sleitulaust starf undir erfiðum aðstæðum, en allt of sjaldan sé vakin athygli á þeirra góðu störfum.

Á sunnudagskvöld deildi Alma frásögn af atvikinu á facebooksíðu lögreglunnar á höfuðborgarsvæðinu, og viðbrögðin voru mikil. Fjölmargir tóku undir með Ölmu um að of sjaldan fái lögreglumenn landsins hrós fyrir störf sín.

Mynd/skjáskot af facebooksíðu Lögreglunnar á höfuðborgarsvæðinu.

„Ég gat bara ekki hugsað mér annað en koma þessu þakklæti á framfæri einhvern veginn, ég varð að koma því frá mér,“ segir hún en lögreglan skrifaði sjálf athugasemd undir færsluna þar sem tekið var fram að skilaboðum Ölmu hafði verið komið áfram til þeirra sem komu á vettvang og komu syni hennar til bjargar.

„Ég sá og upplifði hversu heppin við erum að eiga þessa mikilvægu starfsmenn sem eru í raun þeir mikilvægustu af öllum þvi það dýrmætasta sem er til erum við, fólkið og líf okkar.“