„Maður er smeykur um að heilbrigðisyfirvöldum hafi verið hleypt í málið og þetta sé ekki gamli góði Blái Opalinn,“ segir sagnfræðingurinn og þjóðfélagsrýnirinn Stefán Pálsson sem fagnar endurkomu sælgætisins sem hefur ekki verið fáanlegt síðan 2005.

Auðjón Guðmundsson, framkvæmdastjóri markaðs- og sölusviðs Nóa Síríus, nánast staðfesti í samtali við visir.is í gær, fimmtudag, að Blár Opal ætti eftir að rata aftur í verslanir hér á landi á næsta ári. Varan nýtur enn í dag mikilla vinsælda og tóku margir aðdáendur hennar gleði sína á ný á samfélagsmiðlum þegar fréttin birtist. Stefán er einn þeirra og er ánægður með ákvörðun sælgætisframleiðandans.

„Fyrstu kynni minnar kynslóðar af hörðum fíkniefnum voru náttúrlega í gegnum Bláan Opal og hins vegar í gegnum brenni. Þar lék klóróformið sem var í þessum vörum væntanlega lykilhlutverk og ég óttast að við munum ekki fá þetta gamla bragð aftur. Það var enginn tilgangur að stinga upp í sig einni eða tveimur töflum heldur tók maður lúku og bruddi af miklum móð. Alveg þangað til manni sortnaði fyrir augun og rakettur fóru að springa. Það væri óskandi að komandi kynslóðir fengju að upplifa þetta og tengi þetta ekki eingöngu við herfilegt Eurovision-band,“ segir Stefán í samtali við DV.

Blár Opal var fyrst tekinn úr sölu árið 1982 og kom aftur á markað tæpum tveimur árum síðar. Innihélt varan þá einungis 1,4 prósent af aðalbragðefninu, klóróformi, en samkvæmt nýlegri reglugerð á þeim tíma var miðað við að hámarki tvö prósent.

„Þá var þetta nú ekki sama „rúsið“. Næsta sem þarf að gerast er að menn taki Prins Pólóið úr þessum lofttæmdu lokuðu umbúðum og setji það aftur í smjörpappírinn með álpappírnum utan á svo það verði aftur svona smá fúkkabragð af því og þá verð ég góður. Allt sem nærir nostalgíuna er gott.“