Athugasemd sem Kópavogsbúinn Friðjón Árnason skrifaði við frétt af fólki á DV.is er vinsælasta athugasemd sem skrifuð hefur verið á vefinn í sögu hans. Í athugasemdinni felst hárbeitt gagnrýni á DV fyrir viðtal við fatahönnuðinn Manúelu Ósk Harðardóttur.

Í fréttinni af Manúelu, sem fellur undir þann hluta vefsins þar sem sagðar eru fréttir af fólki, er greint frá því að hún hafi nýverið flutt til Bandaríkjanna, þar sem hún hyggst stunda nám. Rifjaður er upp skilnaður hennar við Grétar Rafn Steinsson knattspyrnukappa, svo eitthvað sé nefnt. Tæplega 40 þúsund manns hafa lesið fréttina.

Sjá einnig: Manuela Ósk flutt til Bandaríkjanna

Athugasemdin sem Friðjón skrifar er kostuleg. Í henni segir hann frá frænku sinni, sem sennilega er ekki til, sem flutti nýlega frá Grenivík til Reykjavíkur. Hann rekur hvernig hún kom sér milli staða, hvað hún snæddi á leiðinni og að hún hafi notað salerni. Hún hafi nú komið sér fyrir í kjallaraholu í borginni, þar sem hún búi ásamt tveimur Pólverjum, sem stundi ólöglega vinnu á Íslandi.

Friðjón fer yfir hjónabandssögu gömlu konunnar og segir hana komna af guðhræddum framsóknarsálum, svo stiklað sé á stóru.

Friðjón hefur vægast sagt fengið góð viðbrögð við athugasemdinni en þegar þetta er skrifað hafa tæplega þúsund manns látið velþóknun sína í garð athugasemdarinnar í ljós. Reyndustu menn á ritstjórn DV muna ekki annað eins, enda verður ekki annað sagt að en skotið hitti beint í mark.

Hér fyrir neðan má sjá athugasemd Friðjóns en DV hefur ekki tekist að ná af honum tali morgun.