„Ég var bara alveg ákveðin í að finna þau,“ segir Andrea Hauksdóttir í samtali við blaðamann DV en á fögunum auglýsti hún á facebook eftir ónefndu áströlsku pari sem hún hafði komist í kynni við í Tælandi árið 2013. Parið var á þeim tíma nýgift og tók Andrea af þeim fallegar ljósmyndir. Leitin átti svo sannarlega eftir að vinda upp á sig og leiddi meðal annars til þess að ástralskur útvarpsþáttur hafi samband við Andreu í því skyni að hjálpa henni að finna parið.
Forsaga málsins er sú að Andrea var í bakpokaferðalagi um Tæland í mars 2013. Í Koh Phi Phi komst hún í kynni við hin nýgiftu hjón sem voru þar stödd í brúðkaupsferð. Í kjölfarið fóru þau saman í bátsferð þar sem Andrea smellti meðfylgjandi myndum af parinu og lýsir hún því þannig að aðstæðurnar hafi verið nokkuð krefjandi þar sem hún þurfti troða marvaða í vatninu á meðan hún smellti af.
Vel fór á með Andreu og hjónunum. „Ég lofaði síðan að senda þeim myndirnar og tók niður nöfnin og adressuna hjá þeim. Síðan gerist það að ég týndi upplýsingunum sem ég hafði skrifað niður. Ofan á það krassaði kortið á myndavélinni minni. Fyrir rúmu ári fékk ég síðan viðgerðarmann til að gera við kortið og þá fann ég myndirnar, ásamt fleiri myndum sem ég hafði tekið.“
Andrea kveðst ólm hafa viljað koma myndunum til parsins en hafði takmarkaðar upplýsingar til að byggja á. „Það eina sem ég vissi var að þau væru frá Melbourne og að konan hét Bianca og átti pólska foreldra.“
Leitaði Andrea því á náðir samfélagsmiðla þar sem hún tók fram að parið væri frá Melbourne í Ástralíu og bað fólk um að deila upplýsingunum. Tugir einstaklinga deildu færslunni sem hún birti á facebooksíðu sinni þann 1.október síðastliðinn.
„Það var alveg slatti af fólki sem setti sig síðan í samband við mig og bauðst til að setja sig í samband við fólk sem það þekkir í Ástralíu,“ heldur hún áfram og kveðst hafa verið nokkuð vongóð um að finna parið þrátt fyrir að það væri staðsett hinum megin á hnettinum, í fimm milljón manna borg. „Ég vonaði bara að þau væru ekki skilin, því þá myndi þá verða frekar vandræðalegt!“
Svo gerist það að ástralskur útvarpsþáttur hefur samband við mig og ég fer í viðtal við þá. Móðir náins vinar þeirra hlustar síðan á þáttinn og kveikir á því að þetta séu þau. Ég fékk síðan skilaboð frá þeim á facebook og það var æðislegt að heyra í þeim,“ segir hún síðan en fréttamiðlarnir Daily Mail og 3AW hafa einnig fjallað um leit Andreu.
Í ljós kom að parið var svo sannarlega enn gift og hamingusamt með eindæmum. „Þau voru ótrúlega glöð að fá myndirnar og sögðu að þetta hefði verið besti parturinn af ferðinni,“ segir hún og tekur undir að máttur samfélagsmiðla sé svo sannarlega mikill, og sýni í raun hvað heimurinn sé orðinn lítill.
