Um 2600 fermingarbörn um allt land ganga í hús þessa vikuna og safna peningum til vatnsverkefna Hjálparstarfs kirkjunnar í Afríku. Framlag þeirra er gríðarlega mikilvægt en í fyrra söfnuðu fermingarbörnin um átta milljónum króna.

Fyrir söfnunina fengu börnin fræðslu um aðstæður fólks sem býr við erfið lífsskilyrði og fengu tækifæri til að ræða um sameiginlega ábyrgð jarðarbúa á því að allir fái lifað mannsæmandi lífi.

Ahmed Nur Abib og Million Shiferaw sem vinna að verkefnum Hjálparstarfs kirkjunnar í Eþíópíu komu til Íslands í lok september og voru til loka október til þess að fræða fermingarbörn um aðstæður í Eþíópíu en þar er einmitt stærsta verkefni Hjálparstarfs kirkjunnar í þróunarsamvinnu.

Meginmarkmið verkefnisins er að treysta fæðuöryggi og auka framfærslumöguleika fátækra bænda með því að bæta aðgengi að vatni, stuðla að betri ræktunaraðferðum og meiri framleiðni ásamt því að vinna að valdeflingu kvenna í samfélaginu.

Hjálparstarfið biður landsmenn að að taka vel á móti fermingarbörnunum þegar þau banka upp á.