Óhætt er að segja að íslenskir Marvel-aðdáendur hafi fagnað þegar Tómas Lemarquis hreppti hlutverk Caliban í stórmyndinni X-men: Apocalypse sem kom út fyrr á árinu. „Það var ótrúleg lífsreynsla að taka þátt í þessu stóra verkefni með Bryan Singer,“ sagði Tómas í samtali við DV á sínum tíma. Hlutverk Tómasar var ekki stórt en veigamikið í framvindu myndarinnar. Kvikmyndirnar úr smiðju Marvel hala iðulega inn mestar tekjur í kvikmyndahúsum ár hvert og hafa leikararnir oft verið nokkuð fastheldnir á hlutverk sín.

Það voru því nokkur vonbrigði þegar tilkynnt var að leikarinn Stephen Merchant, sem er þekktastur fyrir hlutverk sitt úr bresku Office-þáttunum, myndi fara með hlutverk Caliban í nýrri mynd úr smiðju Marvel sem ber heitið Logan. Eins og nafnið gefur til kynna þá snýst myndin um Jarfann vígalega sem stórleikarinn Hugh Jackman hefur ósjaldan leikið.

Myndin gerist 50 árum eftir atburðina í X-men: Apocalypse og herma heimildir DV að framleiðendur myndarinnar hafi ákveðið að láta Caliban þróast í útliti frá fyrri myndinni. Búast má við að Tómas hafi tekið fréttunum af æðruleysi. „Á hverju ári er ég viðriðinn einhverjar myndir sem verða ekki að veruleika. Maður lærir með tímanum að brynja sig og hætta að vera vonsvikinn. Þetta er rosalega brothættur heimur,“ sagði Tómas í áðurnefndu samtali við DV. Hann mun fara með eitt aðalhlutverkanna í rúmensku myndinni „Touch me not“.