Söngkonan Sigríður Beinteinsdóttir ræðir opinskátt um samkynhneigð sína í þættinum Mannamáli á Hringbraut í kvöld. Hún segist ekki þola þegar fólk segir hana vera hinsegin. Hún sé bara Sigga og ekkert svo öðruvísi en annað fólk. Þetta kemur fram á vef Hringbrautar.

Þar segir að hún hafi kynnst mótvindum í lífinu því fyrir ári hafi hún glímt við blóðtappa „eftir mikla streitutíma og svefnleysi við uppeldi tvíburanna sinna.“ Hún hafi kannski verið orðin full gömul til að eignast börn, ólíkt sambýliskonu sinni Birnu Maríu Björnsdóttir sem gekk með þau. „Sigga lýsir þessum erfiða tíma í lífi sínu af nákvæmni og miklu hispursleysi – og vill með því upplýsa allan almenning um orsakir, einkenni og eftirköst þessa krankleika.“

Þátturinn er á dagskrá Hringbrautar klukkan 20:30 í kvöld.