Þór Viðar er himinlifandi með vel heppnaða magaminnkunaraðgerð
„Það er gaman að keyra framhjá KFC, finna lyktina sem þú elskar, en hún hefur engin áhrif,“ segir Þór Viðar Jónsson, sem er búinn að missa 10 kíló frá því að hann fór í magaminnkun í Póllandi fyrir þremur vikum.
Þór Viðar, sem tók þátt í fyrstu þáttaröð raunveruleikaþáttarins Biggest Loser Ísland, er himinlifandi með vel heppnaða aðgerð og þær gríðarlegu breytingar sem hafa orðið á hans daglega lífi í kjölfarið.
„Maginn er núna 250 millilítrar að stærð. Þeir tóku 80 prósent af honum,“ segir Þór sem þarf að passa vel upp á hvað hann lætur ofan í sig og í hve miklu magni svo hann fái rétt hlutfall af öllum næringarefnum.
Þór Viðar sem getur aðeins borðað mjög litla matarskammta í einu segist þó síður en svo hungraður.
„Ég þarf að passa mjög vel hvað ég læt ofan í mig. Að ég fái nógu mikið prótein og drekki vatn. Þá er ég ekki lengur með sterka löngun í skyndibita og annað ruslfæði sem var aðaluppistaðan í mataræðinu áður en ég fór í aðgerðina.“
Þór Viðar kveðst sömuleiðis þurfa að minna sjálfan sig á að borða. Þar að auki hugsar hann nánast ekkert um mat. Fyrir aðgerðina snerist dagurinn meira og minna um hvað hann ætti að fá sér að borða næst.
„Það hvað ég hugsa lítið um mat er eitt og sér mjög merkilegt fyrir matarfíkil. Áður fór ég létt með hálfa pítsu. Nú gæti ég ekki einu sinni klárað hálfa sneið,“ segir Þór Viðar sem kveðst aldrei hafa orðið svangur eftir að hann fór í aðgerðina.
Fleiri jákvæðar breytingar hafa orðið á lífi Þórs síðustu vikur. Hann tók ákvörðun um að hætta að drekka áfengi þar sem honum finnst það ekki henta sér lengur.
Þá bíður hann spenntur eftir því að mega byrja aftur í líkamsrækt, ekki til að léttast heldur í þeim tilgangi að bæta heilsuna.
„Ég þarf að fara varlega fyrstu sex vikurnar eftir aðgerð en ég get ekki beðið eftir að byrja að æfa aftur,“ segir Þór léttur í bragði.
Líkt og áður segir fór Þór Viðar til Póllands í aðgerðina. Hann gefur læknastöðinni sem framkvæmdi magaminnkunina sín bestu meðmæli og segir að hugsað hafi verið fyrir öllu á meðan hann var í umsjá lækna og hjúkrunarfólks læknastöðvarinnar.
„Ég var mjög orkulítill fyrstu vikuna eftir aðgerð. En núna finnst mér ég aldrei hafa verið hressari.“
Viku áður en Þór Viðar fór í aðgerðina var hann 185 kíló. Í dag er hann kominn niður í 170 kíló og hlakkar til að sjá fleiri kíló fjúka.
„Núna loksins skil ég hvernig venjulegt fólk, sem glímir ekki við offituvandamál, lifir lífinu. Það er að segja, líf mitt snýst ekki lengur um mat, sem er stórkostlegt.“
