Hvannadalshnjúkur mældist 3,2 metrum hærri en opinberar tölur segja, um liðna helgi. Þrír starfsmenn fyrirtækisins Ísmars, sem sérhæfir sig í sölu á tækjabúnaði til landmælinga fóru á Hvannadalshnjúk síðastliðinn laugardag og komust að niðurstöðunni.

Í samtali við DV segir Jón Tryggvi Helgason, framkvæmdastjóri Ísmars og einn þremenninganna sem fóru á jökulinn að líklegt þyki að ástæðan fyrir því að mælingin hafi reynst hærri sé vegna þykks lags af snjó og framskrið jökulsins. Jökullinn mældist 2.113,2 metrar á hæð en opinberar mælingar frá árinu 2005 segja að jökullinn sé 2.110 metrar á hæð.

„Við gerðum þetta nú bara að gamni okkar, að mæla hæð jökulsins. Við erum ekkert að gefa út opinberar tölur, en þetta er svipaður búnaður sem við vorum með og Landmælingar Íslands nota,“ segir Jón Tryggvi í samtali við DV.

Tækjabúnaður. Tækjabúnaðurinn sem Ísmarsmenn notuðu.

Mynd: Facebook/Ísmar

„Við skráðum okkur félagarnir í gönguhóp hjá Ferðafélagi Íslands, þar sem við byrjuðum að ganga á fjöll í janúar og stefnan var tekin á að enda á Hvannadalshnjúki,“ svarar hann aðspurður hvað hafi komið til að þeir hafi ákveðið að fara á Hvannadalshnjúk. Þá segir hann að ferðin hafi gengið vel og að gangan hafi í heildina tekið tæpa 15 tíma, en að göngufólk hafi verið misþreytt þegar henni hafi verið lokið.