Leikarinn Gunnar Jónsson, oftast kallaður Gussi, veiddi risastóran þorsk þegar hann sigraði í sjóstangaveiðimóti nú um helgina. Þorskurinn vó yfir 37 kíló og var veiddur í Faxaflóa, út fyrir strendur Akraness.

Síðastliðinn laugardag tók Gussi þátt í innanfélagsmóti Sjóskips. Siglt var frá Akraneshöfn og út á Faxaflóa þar sem keppnin fór fram. Þar veiddi Gussi stærsta þorskinn sem reyndist vera 37,5 kíló og segir hann það vera óskráð Íslandsmet.

„Þetta er ekki skráð sem Íslandsmet því þetta er innanbúðamót. Hefði þetta verið á Íslandsmótinu væri þetta nýt met, því stærsti þorskurinn sem veiðst hefur þar var 26,015 kíló. Þann þorsk veiddi Jóhannes Marían Simonsen, formaður Sjóskips, árið 2014 í Siglufirði,“ segir Gussi í samtali við DV.

Loðna. Hér má sjá loðnuna sem Gussi veiddi.

Mynd: Aðsend mynd

Gussi segir að veðrið hafi verið frekar slæmt en það hafi þó ekki komið að sök, þegar uppi var staðið. Hann segir veiðina hafa verið þokkalega. Næststærsti þorskurinn sem veiddist var til að mynda rúm 36 kíló og þriðji þyngsti 32 kíló.

„Ég veiddi einnig loðnu, sem mér er sagt að hafi verið sú stærsta sem veidd var á stöng,“ segir Gussi léttur í bragði og bætir við að engin hrogn hafi verið í loðnunni.

Gussi segist hafa stundað sjóstangaveiði af kappi síðan árið 2011 og á hann skráð Íslandsmet í greininni. Það met setti Gussi árið 2014 þegar hann veiddi 28 kílóa löngu við Vestmannaeyjar.