Þau héldu innilegt og fallegt leynibrúðkaup fyrir sína nánustu og slógu seinna í gott partý með vinum og vandamönnum.
Kristín Þóra er gestur vikunnar í Fókus, viðtalsþætti DV. Hlustaðu á þáttinn á Spotify og öllum helstu hlaðvarpsveitum. Textabrot úr þættinum má lesa hér að neðan.
Kristín og Teitur kynntust fyrir um níu árum síðan með aðstoð internetsins, réttara sagt Tinder, og var fyrsta stefnumótið þeirra göngutúr um miðborgina.
„Við vorum búin að spjalla rosa lengi áður en við hittumst, svo bara leiddi eitt af öðru, við fórum svo á annað deit og annað deit. Þetta var einhvern veginn ótrúlega áreynslulaust,“ segir Kristín brosandi.
En af hverju leynibrúðkaup?
„Það skorar mjög hátt á streituskalanum að halda brúðkaup,“ segir Kristín, sem vissi að hún myndi ekki njóta undirbúningsins, heldur myndi það hafa þveröfug áhrif.
Þau ákváðu að skipta þessu í tvennt. „Þannig að við buðum foreldrum okkar og systkinum, þau vissu af þessu, í Borgarnes og giftum okkur þar. Fórum svo á hótelið. Það var æði að hafa þetta svona tvískipt! Það var bara einhvern veginn í mýktinni og gleðinni, það var hvíti kjóllinn og að ganga inn kirkjugólfið, ótrúlega innilegt og einlægt. Svo seinna héldum við bara partí.“
Vinkona Kristínar, hjónabandsráðgjafinn Kristín Tómasdóttir, „gaf“ hjónin saman í partýinu, Frikki Dór kom að skemmta og var mikið stuð og gleði.
Nú eiga líka hjónin tvo daga til að halda upp á. „Þetta var svo gaman. Þetta var bara akkúrat eins og við vildum hafa það,“ segir Kristín.
Hún ræðir nánar um ástina, brúðkaupið, leiklistina, kulnun og margt fleira í Fókus, sem má hlusta á í heild sinni hér.
Kristín er enn að sýna Á rauðu ljósi í Þjóðleikhúsinu þar sem hún talar til áhorfenda á bráðfyndinn hátt, en um leið af einlægni og hispursleysi, um stress, streitu, seiglu, aumingjaskap og dugnað.
