Vanalega myndi það heyra til tíðinda að íslenskur tónlistarmaður væri kominn með 3 milljónir mánaðarlega hlustenda á streymisveitunni Spotify og eitt lag í 200 milljón hlustunum. En það er nákvæmlega það sem tónlistarmaðurinn Yaelokre, eða Keath Ósk, hefur náð. Samt hafa fáir Íslendingar heyrt minnst á hán.
Rithöfundurinn Andri Snær Magnason bendir á þetta afrek í færslu á samfélagsmiðlum, en hann hafði þá nýlega heyrt af því frá tónlistarmanninum Unnsteini Manuel Stefánssyni. Það er að kvár frá Akureyri, með filippínskar ættir, sem gengur undir listamannsnafninu Yaelokre væri gjörsamlega að slá í gegn.
„Það er árangur sem aðeins Laufey, Björk og Monsters and men hafa náð og hán mun víst fylla tónleikahallir úti í heimi. Merkilegt að það sé hægt að ná slíkum árangri á lítilli eyju en næ ekki að gúggla neina umfjöllun hérlendis,“ segir Andri Snær.
Yaelokre sló í gegn á TikTok árið 2024 og er nú á samningi hjá útgáfufyrirtækinu Atlantic Records. Tónlistin nokkurs konar framsækin og nútímaleg þjóðlagatónlist með filippínskar rætur. Yaelokre er gjarnan í líflegum búningum á sviði en eins og kemur fram í tölfræði á siðunni setlist.fm þá hefur hán aldrei komið fram á tónleikum hérlendis. Aðeins í Filippseyjum, Bandaríkjunum, Bretlandseyjum og á meginlandi Evrópu.
Lagið Harpy Hare hefur fengið tæplega 200 milljón hlustanir á streymisveitunni Spotify og fjölmörg önnur lög hafa fengið tug milljóna hlustana.
