Þættirnir nutu gríðarlegra vinsælda á sínum tíma en í þeim var fylgst með einstaklingum sem glímdu við ofþyngd keppa við hvort annað um að léttast sem mest.
Ryan Benson var fyrsti sigurvegari þáttanna árið 2004 en í byrjun seríunnar var hann 150 kíló. Þegar yfir lauk vó hann rúm 90 kíló og fékk hann í sinn hlut 250 þúsund dollara, rúmar 30 milljónir króna á núverandi gengi. Benson segir að eftir á að hyggja hafi þátttakan ekki verið peninganna virði, langt því frá.
Til að búa til gott sjónvarp voru þátttakendur látnir ganga í gegnum miskunnarlausar æfingar á sama tíma og hitaeiningainntaka var skorin við nögl. Sumir fóru í gegnum heilu dagana á minna en þúsund hitaeiningum á sama tíma og þeir brenndu allt að 6.000 kaloríum í ræktinni og í hinum ýmsu þrautum.
Í þáttunum segir Ryan, sem í dag er 56 ára, frá þeim sálrænu áhrifum sem Biggest Loser-þættirnir höfðu á hann. Þyngdartapið átti ekki eftir að endast og ekki löngu eftir að þáttunum lauk hafði hann bætt allri þyngdinni aftur á sig og meira til.
„Ég missti allan fókus á að vera heilbrigður því þetta snerist bara um að vinna,“ segir Ryan meðal annars og bætir við að honum – og fleiri þátttakendum – hafi liðið eins og framleiðendur þáttanna vildu að þeim myndi mistakast. „Við vorum klárlega misnotuð,“ segir hann.
Ryan rifjar upp að læknar hafi skoðað þvag keppenda daginn áður en lokavigtunin fór fram og hann hafi til dæmis fengið þau skilaboð að blóð hefði fundist í hans þvagsýni. „Ég var svo þurr,“ segir hann. Til að reyna að tryggja sér sigur segir Ryan að hann hafi reynt að neita sér um vökva síðustu tíu dagana og drekka aðeins örlítinn sítrónusafa til að halda sér gangandi.
Þetta átti eftir að skila sér í sigri en Ryan rifjar upp að fimm dögum eftir að hann var krýndur sigurvegari hafi hann verið búinn að bæta á sig 14 kílóum. Hann hélt áfram að þyngjast uns hann var orðinn 160 kíló – meira en hann var áður en þættirnir hófust.
Ryan segir að þetta hafi haft ýmis sálræn áhrif í för með sér og hann hafi glímt við sektarkennd eftir að hann þyngdist aftur. Honum hafi liðið eins og honum hafi mistekist og valdið fólki vonbrigðum.
Þáttaröðin á Netflix ber heitið Fit for TV: The Reality of the Biggest Loser og var hún frumsýnd þann 15. ágúst síðastliðinn.
