Fasteignaauglýsingar vekja jafnan mikla athygli á DV sem og öðrum miðlum. Margir að spá og spekulera sem vilja flytja sig um set, stækka eða minnka við sig, aðrir að kaupa sína fyrstu eign. Og svo eru þeir sem vilja bara sjá hvernig aðrir búa.

Í toppsætinu á DV núna er einbýlishús sem samkvæmt skráningu fasteignasölunnar er í 101 Reykjavík. Verðið hræbillegt eins og sagt er, aðeins 14,9 milljónir króna sem væri líklega verðið á bílastæði í bílakjallara fjölbýlishúss í miðborginni. Ef slíkt stæði væri í boði, en ekki boðið til leigu af fyrirtæki í eigu einkaaðila.

Húsið eldrauða sem virðist spretta beint af síðum barnabókahöfundarins ástsæla Astrid Lindgren er hins vegar í Svíþjóð, nánar tiltekið í sveitarfélaginu Hjo sem er í um tveggja klukkustunda akstursfjarlægð frá Gautaborg. 

„Húsið hefur verið í eigu Íslendinga í mörg ár og hefur verið mikið notað,“ segir í lýsingu sem skýrir mögulega ranga landskráningu eignarinnar.

Húsið er byggt árið 1947, 228 fermetrar, ein og hálf hæð með kjallara, ásamt tvöföldum bílskúr á 1505 fermetra eignarlóð, sem er girt og gróin lóð með plómu-, peru- og eplatrjám.

Skipulag á hæð 1. Forstofa, eldhús, svefnherbergi með útgengi út á verönd, snyrting og stofa. 

Skipulag á hæð 2. Gangur með útgengi á svalir, þrjú svefnherbergi.  Massíft viðargólf á allri hæðinni. Innréttanlegar geymslur.

Skipulag í kjallara. Verkstæði, ketilrými, þvottahús, matargeymsla og geymsla.

Sænska húsið sem er til sölu, þó ekki því miður í 101.

Nánari upplýsingar um eignina má finna hér.