Elsta Kardashian-systirin, Kourtney, er komin með nóg af barnsföður sínum og fyrrverandi unnusta, Scott Disick. Hún vill hann úr raunveruleikaþáttunum um Kardashian-fjölskylduna og í raun vill hún alfarið sparka honum úr fjölskyldunni. Frá þessu greinir Star.

Kourtney og Scott voru sundur og saman á árunum 2006-2015 og eiga saman þrjú börn. Að sögn heimildarmanns finnst henni vægast sagt pirrandi að þrátt fyrir að ástarsambandi þeirra hafi endanlega lokið fyrir áratug þá sé Scott enn að nýta sér frægð fjölskyldunnar og láti enn eins og hann sé hluti fjölskyldunnar. „Henni finnst það sjúklega pirrandi að hann sé enn í þáttunum og hangi enn utan í fjölskyldunni eins og einhver óþefur“

Henni mun eins finnast það vægast sagt ógeðfellt hvernig hann daðrar við yngri systur hennar.

„Ef Kourtney fengi sínu fram þá væri Scott ekki lengur í myndinni.“

Kourtney giftist pönkrokkaranum Travis Barker árið 2022 og eiga þau saman eitt barn.

Heimildarmaðurinn segir þó að fjölskylda Kourtney sé ekki á sama máli og hún. Þau elska Scott. Móðir Kourtney, Kris Jenner, lítur á Scott sem son sinn og þykir elsta dóttir sín vera heldur leiðinleg og kuldaleg við hann.

„Þeim finnst hann mjög skemmtilegur og benda reglulega á að hann sé frábær pabbi. En nú er þessi umræða komin upp aftur því það styttist í jólin og allir vilja bjóða Scott í fjölskylduboðin en Kourtney hefur ákveðið að stíga niður fæti og segist sjálf mögulega ekki ætla að mæta ef hann verður þarna.“