Eigendur Þrastalundar við Sogið hafa ákveðið að selja þennan sögufræga áningarstað ásamt eign sinni við Vatnsveg 5 í Reykjanesbæ. Stefnan er tekin á ný mið og ætla eigendur nú að hefja nýja uppbyggingu annars staðar á Suðurlandi.

Þrastalundur er klárlega þekktasti áningarstaður landsins. Þar hefur verið rekinn margómaður veitingastaður sem var hannaður af Leifi Welding og er heppilega staðsettur í hjarta Gullna hringsins.

Þrastalundur hefur notið mikilla vinsælda á undanförnum árum, bæði meðal innlendra sem og erlendra gesta. Skemmst er að minnast þess að heimsfrægi matreiðslumeistarinn Gordon Ramsay hefur gert sér þangað fer fjögur ár í röð.

Sjá einnig: Frægur sjónvarpskokkur í Þrastalundi – „Hann er svo mikil fyrirmynd og mikill innblástur“

Að sögn eigenda hafa verið hugmyndir um uppbyggingu stórs hótels í tengslum við núverandi veitingastað, enda Þrastalundur einstakur staður þar sem náttúra, saga og framtíðarmöguleikar mætast á einum fegursta stað Suðurlands. Það eru því næg tækifæri fyrir nýja eigendur.

Svo er það eign við Vatnsnesveg 5 sem samanstendur af sex íbúðum og bílskúrum í miðbæ Reykjanesbæjar sem býður upp á fjölbreytta nýtingarmöguleika, meðal annars fyrir hótel eða þjónustustarfsemi. Nýtt aðal- og deiliskipulag gerir ráð fyrir mikilli uppbyggingu á svæðinu, þar sem heimilt er að byggja stórt hótel eða fjölbýlishús í tengslum við núverandi byggingar.

„Við fjölskyldan erum að hefja spennandi uppbyggingu annars staðar og því höfum við ákveðið að selja þessar eignir,“ segir eigandinn, Sverrir Einar Eiríksson.

Þrastalund ættu flestir landsmenn að þekkja enda var fyrsti áningarstaðurinn, söluskáli, opnaður þar árið 1967.