Ragnhildur Þórðardóttir, betur þekkt sem Ragga Nagli, gefur lítið fyrir lista um boð og bönn á fyrsta stefnumóti. Ragga sem hefur verið hamingjusamlega gift í fjölda ára ráðleggur þeim sem hyggja á stefnumót að vera einfaldlega það sjálft.
Ragnhildur er sálfræðingur með áherslu á heilsusálfræði og lærður einkaþjálfari. Pistlar hennar um heilsu á mannamáli hafa slegið í gegn um árabil.
„Gleðilegan fimmtudag til allra nema mannsins sem setti saman þennan niðurdrepandi lista um boð og bönn á fyrsta stefnumóti. Þessi klíníski sálfræðingur blæs í gjallarhorn hvað þú átt að gera og hvað ALLS EKKI ef þú vilt að stefnumót gangi vel og viðkomandi vilji hitta þig aftur,“ segir Ragga og fer yfir listann:
„Þú átt semsagt að stara beint í augun á manneskjunni ALLAN tímann. Af því það lætur engum líða óþægilega. Alls ekki láta augun vafra um herbergið eins og okkur er eðlislægt að gera.
Talaðu í hárréttri tóntegund á nákvæmlega passlegum hraða.
ALLS EKKI tala of mikið…. hversu mikið er ekki gefið upp. Svo það er líklega best að þegja sem allra mest.
En á sama tíma áttu að vera forvitin um manneskjuna en passa samt að spyrja ekki of persónulegra spurninga.
Vera opin og svara spurningum. En gera það þá líklega bara í eins atkvæðis orðum.
Af því það gerir alla meira spennandi að svara JÁ og NEI eins og í þriðju gráðu yfirheyrslu hjá Rannsóknarlögreglunni.
Alls ekki láta í ljós skoðanir á hlutum sem skipta máli. Alls ekki spyrja um það heldur. Ekki pólitík, ekki samfélagslegum málefnum, stríði, trúarbrögð. Guð hjálpi þér að þú viljir komast að því hvort þið eigið samleið í svo mikilvægum málefnum.
Og þú verður að njóta þín á stefnumótinu meðan þú situr grafkyrr, starir bara á manneskjuna, ritskoðar hverja spurningu og treður á eggjaskurnum í kringum pólitík og trúarbrögð, úsar út hlýju, talar nógu rólega og nógu lítið en samt nógu mikið til að sýna forvitni og samkennd með tilfinningum manneskjunnar.“
Tekið saman þá segir Ragga að listinn ráðleggi þér að setja á svið leikrit með grímuna límda á smettið, þar sem þú eigir ekki að vera þú sjálf(ur/t).
„Labbaðu út af stefnumótinu örmagna eftir að hafa verið ofurvakandi yfir eigin hegðun.
Ekki vera með kvíða á fyrsta stefnumóti.
Ekki sýna ADHD einkenni.
Að tala mikið og hratt, vera eirðarlaus, ofurvakandi fyrir umhverfinu, spyrja skrýtinna spurninga, eru merki um kvíða, ADHD og að vera á einhverfurófinu.“
Í lokið kemur Ragga með róttæka hugmynd um hvernig eigi að haga sér á stefnumótinu sem er undir innblástri frá Helga Björns:
Vertu þú sjálfur, gerðu það sem þú vilt.
Vertu þú sjálfur, eins og þú ert.
Láttu það flakka, dansaðu í vindinum.
Jamm og jive og sveifla.
Honky tonk og hnykkurinn.
Að lokum gefum hún manninum sem samdi listann ráð: „Troddu þessum lista þú veist hvar.“
