Guðríður Haraldsdóttir, Gurrí eins og hún er best þekkt, blaðamaður og prófarkalesari hefur sett íbúð sína að Jaðarsbraut á Akranesi á sölu. 

„OPIÐ HÚS sunnudaginn, 23. júní nk. kl. 16-16.30! Jaðarsbraut 41, Akranesi, efsta bjalla. Fótboltinn hefst ekki fyrr en kl. 19 svo það sleppur. Almennilegt kaffi á könnunni. Sniðugt fyrir utanbæjarfólk að kíkja í Guðlaugu og sundlaugina (á hlaðinu) í leiðinni, ísbúðirnar, vitana og antíkskúrinn, svo fátt eitt sé nefnt. Veðurspáin segir: milt veður, suðvestanátt, skýjað … sjórinn samt alltaf fallegur,“ segir Gurrí á Facebook.

Íbúðin er 99,3 fm á fjórðu (efstu) hæð í húsi byggðu árið 1955.

Íbúðin skiptist í hol, eldhús, stofu með útgengi á litlar svalir í austur (með útsýni í átt að fótboltavellinum og Esjunni), einnig stórar svalir í suður með útsýni til sjávar, tvö svefnherbergi baðherbergi þar sem er hleri að geymslulofti. Möguleiki er á því að gera aukaherbergi í stofu. Eldvarnarhurð er inn í íbúðina. 

Gurrí keypti íbúðina árið 2006 og tók hana alla í gegn árið 2020. „Hún er orðin æðisleg núna. Ég fékk innanhússhönnuð til að teikna upp breytingarnar sem var afskaplega góð hugmynd, sparaði mér fé og kom ábyggilega í veg fyrir ýmis mistök. Í leiðinni notaði ég líka tækifærið og losaði mig við helminginn af dótinu mínu. Hver þarf þrjá eggjaskera, átta sængurverasett, milljón bækur? Lífið er svo miklu léttara og auðveldara með minna magn af dóti í kringum sig, afskaplega fljótlegt að taka til og halda öllu hreinu,“ sagði í viðtali við Lifðu núna í fyrra. 

„Ég horfði á eldgosið á Reykjanesskaga í gegnum sjónvarpið og sá það stundum úr gluggunum heima en íbúðin var sérvalin á sínum tíma vegna útsýnisins. Útsýnið úr risíbúð minni sem ég kalla Himnaríki á blogginu, er einstakt, óhindrað sjávarútsýni – stundum brim sem er líka eitt af áhugamálum mínum, ásamt lestri auðvitað og tónlist.“

Nánari upplýsingar um eignina má finna hér.