„Ég þarf að vera tilbúin til að fara út til þegar kallið kemur. Ég á fjögur börn og þar af þrjú ung börn. Þannig ég get ekki farið til Srí Lanka með ekkert í höndunum bara til að leita. Það er ekki hægt. En ég er líka námsmaður og ligg ekki á sjö eða átta hundruð þúsund sem þarf í svona ferð,“ segir Tinna Rúnarsdóttir í viðtali við Vísir.is til styrktar þeirri vegferð sinni að hafa uppi á ættingjum sínum Sri Lanka.
Tinna var ættleidd ársgömul til Íslands frá Srí Lanka árið 1985. Hér hefur hún átt gott líf en hana langar til að komast í samband við ættingja sína í heimalandinu. Hún hefur notið aðstoðar Auri Hinriksson við leitina en Auri er líklega búin að hafa upp á móður Tinnu. Auri var í fyrra sæmd fálkaorðunni fyrir störf sín í þágu ættleiddra. Hafði hún þá aðstoðað um 35 Íslendinga sem leitað hafa uppruna síns í Sri Lanka. Síðan hefur bæst í hópinn.
Tinna segir að skrýtnar tilfinningar fylgi leit hennar að upprunanum. Hún hugsi reglulega til fólksins, hvort blóðmóðir hennar vilji hitta hana, hvort hún vilji vita af henni, hvernig hún líti út og hvort hún verði ánægð af að vita af því að hún eigi fjögur barnabörn sem hún hefur aldrei hitt.
Hún segir ennfremur: „Auri sendi mér mynd, en ég var ekki alveg viss. Ég á eina mynd af okkur saman en ég þori ekki að bera þær of mikið saman af því að ég er svo viss um að óskhyggjan geri það að verkum að maður sjái líkindi.“
Tinna segir ennfremur þetta um söfnunina sem hófst í síðustu viku:
„Mér leið alveg skelfilega með það að biðja fólk um peninga. En svo hugsaði ég að það væri kannski til að styðja svona vegferð. Ég er ekki að biðja um pening fyrir mat eða af því mig langar til sólarlanda. Heldur er ég að fara í stórt verkefni sem skiptir mig svo miklu máli.“
Þeim sem vilja styrkja Tinnu á þessari vegferð og gera henni endurfundina við móður hennar mögulega er bent á þessar reikningsupplýsingar:
