Miðar á tónleika Nick Cave sem fram fara þriðjudaginn 2. júlí næstkomandi í Eldborgarsal Hörpu seldust hratt upp í morgun. Skipulagðir hafa verið aukatónleikar degi seinna.

Hinn ástralski Cave mun troða upp með Colin Greenwood, bassaleikara bresku rokkhljómsveitarinnar Radiohead. Munu þeir flytja valin lög, „hrá og óskreytt“ eins og það er orðað í kynningu Senu Live.

Póstlistaforsalan hófst klukkan 10:00 í morgun. Klukkutíma seinna var tilkynnt að uppselt væri á tónleikana. Ekki fengu allir sem vildu miða á tónleikana. Aukatónleikarnir sem skipulagðir hafa verið munu fara fram 3.jJúlí og hefst miðasala á morgun, föstudag, klukkan 10:00.

Í færslu Senu Live segir:

„Forsala á tónleikana með Nick Cave hófst í morgun kl. 10 og var barist um hvert sæti sem í boði var. Nú er orðið uppselt á tónleikana 2. júlí og þurftu fjölargir frá að hverfa tómhentir.

Ákveðið hefur verið að bæta við auaktónleikum 3. júlí og fara þeir í sölu á morgun kl. 10 á harpa.is/nickcave þegar almenn sala hefst. Stafræn röð verður notuð aftur til að tryggja að salan gangi vel og vernda miðasölukerfið fyrir álagi.“