Hlustaðu á Spotify, Apple Podcasts eða hlaðvarpsveitu Google.
Nína fæddist með skarð í vör og man það vel að hafa fengið síendurtekið þau skilaboð frá samfélaginu að útlit hennar væri mikilvægara en nokkuð annað. Hún var reglulega tekin úr skóla til að fara í aðgerðir og man vel eftir því að hafa þurft að missa af lokaprófum í tíunda bekk til að gangast undir enn eina aðgerðina. Hún vill sjá að þéttar verði gripið utan um börn sem fæðast með sýnilegan fæðingargalla og sálarlíf þeirra.
Hún var lögð í einelti í grunnskóla og ekki hjálpuðu viðbrögð fullorðinna, sem sögðu að þetta myndi allt „lagast“ þegar hún væri búin að gangast undir allar aðgerðir.
„Auðvitað átti ég einhverjar vinkonur en það var margt sem setti mig kannski í stöðu til að verða líklegri til að verða fyrir einelti. Það er bara þannig að allt sem skilur krakka aðeins frá hópnum er bara þannig. Ég hef svolítið talað um þetta að það er ekki einhver ástæða fyrir því að einhver er lagður í einelti. Eina ástæðan fyrir því er að það kemur einhver og tekur ákvörðun um að taka þennan fyrir. Það er ástæðan, ekki hvernig einhver er. En það eru samt hlutir sem ýta kannski undir þetta og þar var til dæmis þetta að mér gekk mjög vel í skóla. Ég las rosalega mikið og kannski er það þetta uppeldi sem ég fékk hjá pabba. Ég var mikið ein heima, kannski tólf til þrettán tíma á dag og þá var ég að lesa ef ég var ekki í skólanum. Það gerir það að verkum að ég stóð mig afburðavel í námi og þurfti ekki að hafa fyrir því og það býr til skotspón,“ segir hún.
„Ég er kannski líka ekki alveg alin upp eins og þessi týpíska stelpa. Mér var aldrei kennt almennilega að taka ekki pláss, ég var að frekjast og taka slaginn og bókstaflega lenda í slagsmálum við strákana. Ég var bara svolítið spes, og er enn,“ segir Nína og hlær.
Nína segir að hún hafi upplifað hvernig það er að vera á jaðrinum. „Síðan þetta að vera fædd með skarð og öllu því sem því fylgir. Að vera tekin úr skóla og fara í aðgerðir. Það er náttúrulega líka annað, það fylgir þessu mikið álag á sálarlíf barna að vera stöðugt í aðgerðum og vera tekin að ofan: „Nú þarf að laga þig“ Og það býr til eitthvað „Ó, er ég ekki eins og ég á að vera.“ Svo kem ég til baka og þá fer fólk að mynda sér skoðun, hvort þetta hafi verið nógu vel gert, hvort þurfi að „laga“ meira. Það er rosa skrýtið það sem gerist hjá fólki þegar það er fæðingargalli, sem er ríkisviðurkennt að þurfi að laga, þá virðist fólk gefa sér leyfi til að segja eitthvað,“ segir hún.
„Börn gera þetta en börn eru börn, en fullorðið fólk. Oft heilbrigðisstarfsfólk, oft fæ ég [að heyra óumbeðið athugasemd], skoðun eða álit. Þó ég sé að kvarta undan verki í tánni,“ segir Nína. Þetta gerist stundum enn í dag þegar hún fer til læknis.
„Mér finnst vanta mjög mikið, þetta var þannig þá og ég held þetta sé ennþá svona, að það sé haldið utan um sálarlíf barna sem fæðast með sýnilegan fæðingargalla og þurfa að díla við þetta, að þurfa að fara í tíðar aðgerðir. Er þetta að hafa áhrif á sjálfsmyndina? Þá hvernig? Er mögulega einhver skaðleg hegðun eða „coping mechanismi“ sem þarf að girða fyrir. Það eru þættir þarna sem er ekki verið að hugsa fyrir. Og ég held líka að það sé vegna þess að kerfin eru enn og aftur ekki hönnuð af fólkinu sem er að nota þau.“
Nína segir nánar frá þessu í spilaranum hér að ofan. Brotið er hluti af nýjasta þætti af Fókus, þú getur horft á þáttinn í heild sinni hér eða hlustaðu á Spotify.
Fylgstu með Nínu Richter á Instagram.
