Bragi Valdimar Skúlason, einn af okkar allra vinsælustu og skemmtilegustu textasmiðum, hefur varpað fram nokkrum hugmyndum að nýju nafni fyrir hinn svokallaða „singles Day“ sem er í dag, 11. nóvember.

Dagurinn er stundum kallaður „dagur einhleypra“ en hugtakið „Singles Day“hefur þó náð að festa sig betur í sessi. Um er að ræða kínverska hefð sem hófst á tíunda áratug síðustu aldar og var fljót að breiðast út um heimsbyggðina.

Í færslu á Facebook-síðu sinni notar Bragi Valdimar kjarnyrta íslensku og segir:

„Ágætu andlausu, óinnblásnu kaupahéðnar og enskuupplepjandi skransalar. Hér fáið þið fáeinar tillögur að íslenskum heitum á þennan eymingjans ellefta nóvember, dag einhleypra, sem þið kjósið raunar ítrekað og umhugsunarlaust að kalla „singles day“ – og já – sem þið megið gjarnan að óbreyttu troða þéttingsfast upp í greiðslugáttirnar á ykkur.“

Færslunni fylgja svo nokkrar skemmtilegar tillögur:

Eindagi

Stakdægur

Einidagur

Dagur einmanaleikans

Einsemdadægur

Ógiftudagur

Kaupársdagur

Einkaupadagur

Álausudagur

Einverudagur

Staklingamessa

Dagur hinna einstæðu

Ókvænisdagur

Einsa–mall

Dagurinn eini

Einverjadagur

Dagur einstæðinga

Einhleypidagur

Lausliðugramessa

Einkaupadagur

Skrandagur

1111