Svona hefst bréf konu til Sally Land, sambands- og kynlífsráðgjafa The Sun. Konan er 52 ára og eiginmaður hennar er 56 ára. Þau hafa verið gift í 25 ár og eiga saman tvo uppkomin börn.
„Ég vissi að það væri eitthvað gruggugt í gangi þegar ég var að fara yfir bankayfirlitið okkar og sá einhverjar skrýtnar millifærslur.
Eiginmaður minn ferðast oft á milli landa vegna vinunnar en hann notar þá fyrirtækjakortið sitt.
En í þetta skipti tók hann út pening af reikningnum okkar. Hann var í Amsterdam.
Ég pældi ekkert mikið í því þar til ég sá orðin „De Wallen“ á yfirlitinu, sem ég veit að er í Rauða hverfinu. Ég var miður mín um leið og ég fattaði það.
Ég talaði við hann um þetta um leið og hann kom heim og hann játaði allt saman. Hann brotnaði niður og viðurkenndi að hann hefur verið að sofa hjá vændiskonum í mörg ár. Þegar ég spurði hversu mörgum sinnum sagðist hann ekki vita það en það væri allavega nokkur hundruð skipti.
Það versta er að hann sagði að það hafi verið með mörgum konum en að hann hafi farið margoft til sömu tveggja vændiskvennanna.
Ég veit að breytingarskeiðið hefur haft mikil áhrif á kynlífið okkar en mér hefði aldrei dottið í hug að hann myndi svíkja mig á þennan hátt. Nú er hann að grátbiðja mig um fyrirgefningu og lofar að gera þetta aldrei aftur.
Ég vil ekki fara frá honum en ég horfi ekki sömu augum á hann lengur. Hvernig getum við unnið úr þessu?“
„Eiginmaður þinn hefur svikið þig og eyðilagt allt traust á milli ykkar.
Áður en þið horfið fram á veginn þá þarftu að tala við hann og spyrja hvað það er sem honum finnst vanta í sambandið. Þú minntist á breytingarskeiðið og áhrifin á kynlífið, er það nánd sem honum finnst vanta?
En ef það er einhver leið til að bjarga hjónabandinu þá þarf hann að leggja hart að sér til að vinna sér inn traust hjá þér á ný. Vertu skýr og segðu honum að hann fái aðeins eitt tækifæri, og stattu við það. Því annars áttu mjög leiðinlegt líf fram undan.“
