Heyrst hefur að Karl Bretakonungur og Vilhjálmur krónprins hafi rætt um að svipta mögulega hertogahjónin, Harry prins og Meghan Markle, konunglegum titlum sínum. Þar með væri hægt að koma í veg fyrir að hertogahjónin séu að nota konunglega titla sér til framdráttar. Karl og Vilhjálmur munu vera ósáttir við að hertogahjónin séu að afla sér peninga og frægðar með því að tala illa um aðra meðlimi fjölskyldunnar.

Konunglegi sérfræðingurinn Kinsey Schofield deilir því þó með Fox fréttastofunni að það sé með öllu tilgangslaust að svipta hertogahjónin titlum. Harry sé fæddur prins og ekki hægt að svipta honum þeim titli. Hann og Meghan fengu konunglegu titlana hertogahjónin af Sussex þegar þau giftu sig en verði þau svipt þeim titlum þá standi eftir að Harry sé prins og Meghan verði sjálfkrafa prinsessa.

„Mörgum okkar finnst eins og Harry og Meghan séu að misnota titla sína og okkur þætti maklegt að þau yrðu svipt þeim, en það er ekki samtal sem Karl konungur og Vilhjálmur prins hafa átt undanfarið. Það er nefnilega tæknilega svo, og Karl og Vilhjálmur vita það, að ef Harry og Meghan eru svipt titlunum hertogi og hertogaynja, þá verða þau sjálfkrafa prinsinn og prinsessan Henry. Það er ekki hægt að svipta Harry prinsatitlinum. Það er blóði borinn réttur hans. Það myndi krefjast aðkomu þingsins til að svipta hann þeim titli og slíkt er í engum forgangi hjá þinginu á þessum tíma. Þú myndir þá líka sjá Harry og Meghan notfæra sér titlana prins og prinsessa sem ætti að vera auðveldara fyrir þau að markaðssetja í Bandaríkjunum.“

Harry heitir réttu nafni Henry Charles Albert David prins. Meghan yrði þá þekkt sem prinsessan Henry samkvæmt konunglegri hefð. Tæknilega gildi sama um Katrínu prinsessu sem heiti prinsessa Vilhjálmur eftir að hún giftist inn í fjölskylduna árið 2011. Hún er þó betur þekkt sem prinsessan af Wales.