Yfirvöld á Baleareyjum á Spáni hafa gripið til þeirra ráðstafana að banna sölu á áfengi á vissum svæðum á eyjunum á milli klukkan 21:30 að kvöldi og klukkan 8 að morgni. Þetta er sagt hugsað til að draga úr þeirri gerð ferðamennsku sem yfirvöld telja óæskilega sem felst einkum í mikilli áfengisdrykkju og samsvarandi skemmtanahaldi næturlangt.

Baleareyjar eru eitt af héruðum Spánar en bæði Mallorca og Ibiza tilheyra eyjunum. Ferðamenn, einkum ungt fólk, hafa talsvert sótt í næturlífið á báðum eyjunum. Bannið gildir til ársloka 2027 og nær til Llucmajor, Palma og Calvia á Mallorca og Sant Antoni á Ibiza.

Svokölluðum partýbátum verður einnig bannað að vera í minna en einnar sjómílu fjarlægð frá þessum stöðum og verður bannað bæði að hleypa farþegum frá borði og að hleypa farþegum um borð.

Daily Mail greinir frá málinu og segir bannið fylgja í kjölfar þess að yfirvöld hafi varað skemmtanaglaða breska ferðamenn við því að þeir gætu fengið háar sektir vegna slæmrar hegðunar eftir að reglur um hegðun á almannafæri voru hertar.

Borgarstjóri Palma sem er stærsta borg Mallorca og höfuðstaður Baleareyja segir sitt markmið vera að kveða niður andfélagslega hegðun bæði hjá ferðamönnum og heimamönnum. Umræddar reglur munu taka gildi síðar á árinu.

Samkvæmt nýju reglunum verða drykkjuveislur á almannafæri bannaðar sem og veggjakrot, rafmagnsvespur og hvers kyns nekt.

Borgarstjórinn, Jaime Martinez, segir núgildandi reglur of vægar og ekki duga til að draga úr andfélagslegri hegðun.