Driver segir að hún hafi ekki fengið að klæðast blautbúning undir fötunum, eins og karlkyns meðleikarar hennar, því framleiðendur kvikmyndarinnar vildu „sjá geirvörturnar [hennar]“ í gegnum skyrtuna. Hún greinir frá þessu í hlaðvarpinu I Weigh.
Hard Rain er spennutryllir um náttúruharmleik og flóð vegna mikillar rigningar. Framleiðendur notuðu yfir 75 milljónir lítra af vatni og stórar „rigningavélar“ til að framkalla áhrif ringingarstorms.
„Þetta var erfitt, þetta var erfið mynd en allir fengu að klæðast blautbúning undir fötunum. En það var sagt við mig að ég mætti það ekki því þeir vildu sjá geirvörturnar mínar og það var engin ástæða að vera í blautum bol ef það væri ekki hægt að sjá það sem var undir,“ segir Driver.
„Það var bara sagt mjög hispurlaust við mig: „Þú er hálfviti ef þú skilur ekki hvað er í gangi.“ Og ég man eftir því að hafa sagt: „Þetta er rangt.““
Driver segir að hún hafi að lokum ákveðið að hringja í umboðsmann sinn og deilt áhyggjum sínum með honum. Hún segir að það hafi því miður leitt til fjandsamlegs vinnuumhverfis.
„Fólk vildi ekki tala við mig á tökustað, mér var refsað fyrir þetta. Því var svo lekið í pressuna að ég hafi kvartað,“ segir hún.
„Það var látið líta út fyrir að ég væri að kvarta yfir engu og ég væri vandamálið. Þessi gaslýsing, gaslýsing af fjölmiðlum sem þitt umhverfi ýtir svo undir og þú getur hvergi farið.“
