Glamúrfyrirsætan og athafnakonan Ásdís Rán Gunnarsdóttir segir frá því þegar systir hennar, Hrefna Sif Gunnarsdóttir, lenti í útistöðum við meðlimi búlgörsku mafíunnar.

Þær voru í fínu teiti í Búlgaríu þegar það gerðist.

„Það móðgaði einhver mig, einhver eldri maður,“ segir Ásdís Rán í nýjasta þætti af Götustrákum á streymisveitunni Brotkast.

„Hann var eitthvað að skjóta á mig og systir mín bara [upp með klærnar] og fór að rífa kjaft við hann. Ég sagði við hana: „Hrefna, haltu kjafti. Bara slakaðu á, ekki gera neitt. Þú veist ekki hver þetta er.“ Ég vissi alveg hver þetta var,“ segir hún, en um var að ræða meðlim búlgörsku mafíunnar.

„Og hún fór eitthvað að rífa kjaft og hann var með byssu báðum megin og hún hélt áfram: „Hver heldurðu að ég sé? Ég er frá Íslandi.“ Hún bara hélt áfram og gerði ennþá meira vesen. Þeir voru ekki vanir að það væri einhver lítil títla, einhver skvísa, að rífa kjaft við þá. Þeir sátu með tíu Playboy-fyrirsætum sem sátu bara [þegjandi] og þorðu ekki að hreyfa sig.“

Ásdís segir að systir hennar hafi haldið áfram að rífa kjaft. „Það endaði með því að þeir voru allir svo hrifnir af henni, þeir voru komnir yfir [til okkar] því þeim fannst svo spennandi að það væri einhver kona að rífa kjaft við þá. Hún var bara að úthúða þeim,“ segir hún.

„Ég var bara að svitna, erum við að fara að deyja núna? En þeir virtu þetta.“