Stikla kvikmyndarinnar Argylle er komin út og eru aðdáendur söngkonunnar Dua Lipa að tryllast af spenningi yfir frammistöðu hennar. Frumraun Lipa á hvíta tjaldinu var lítið hlutverk í myndinni Barbie sem frumsýnd var fyrr á árinu, auk þess sem hún söng lagið Dance The Night í myndinni.

Í Argylle er söngkonan í stjörnuprýddum hópi leikara, en með henni leika Bryce Dallas Howard, Sam Rockwell, John Cena, Bryan Cranston, Sofia Boutella, Ariana DeBose, Catherine O’Hara og Samuel L. Jackson.

Myndin fjallar um ofurnjósnarann ​​Argylle (leikinn af Henry Cavill), sem dregst inn í fjársjóðsleit sem fer með hann um allan heim. Erfið fortíð Argylle gæti þó sett verkefni hans í hættu. Bryce Dallas Howard leikur Elly Conway höfund metsölubóka um njósnir, en hugmynd hennar um sælustund er heima í sófa með kettinum sínum, ekki njósnaferðir um víða veröld. Þegar bækur hennar um njósnarann Argylle fara að endurspegla raunveruleg verkefni leyniþjónustu breyttist líf Conway svo um munar. 

Myndin er í leikstjórn Matthew Vaughn sem á fjölda mynda á ferilskránni sem leikstjóri og framleiðandi, þar á meðal Kingsman trilógíuna, Kick Ass myndirnar, Rocketman, Tetris og Stardust.

Í stiklunni lítur út fyrir að Lipa leiki einn af vondu gaurunum, en aðdáendur Lipa verða að bíða þar til 2. febrúar 2024 til að sjá myndina.

 „Ég mun horfa á Argylle bara vegna Dua Lipa, hún er söguþráðurinn.“

„Dua Lipa kann að gleðja okkur.“

„Þegar ég las fyrstu drögin að handritinu fannst mér þetta ótrúlegasta og frumlegasta njósnasagan síðan í bókum Ian Fleming [um James Bond] á fimmta áratugnum,“ sagði Vaughn í yfirlýsingu á síðasta ári. „Myndin mun breyta njósnamyndageiranum.“