Hreinn Garðar Friðfinnsson, sem er 18 ára gamall, leitaði ekki langt yfir skammt þegar hann leitaði sér að sumarvinnu. Hann hringdi einfaldlega í fyrirtækið Hreinir Garðar ehf., sótti um vinnu og fékk hana.
„Ég á vin sem heitir Bjartur Dagur sem sagði mér að nafnið hans hefði reddað honum mörgum vinnum. Þannig að ég ákvað að hringja í Hreina Garða og sækja um en þetta var bara eitt fyndnasta símtal í heiminum,“ segir Hreinn Garðar í samtali við K100.
„Sagan byrjar í febrúar fyrir nokkrum mánuðum en þá vakna ég um áttaleytið um morguninn við símann. Í símanum var maður sem var að kvarta undan því að ég væri ekki búinn að taka niður jólaseríuna heima hjá honum. Ég, sem er náttúrulega bara einhver unglingur í Reykjavík, leiðrétti misskilninginn um leið og benti á að ég héti Hreinn Garðar en hann væri örugglega að reyna að ná í fyrirtækið Hreinir Garðar. Við sprungum auðvitað báðir úr hlátri.“
Hreinn Garðar sá síðan auglýsingu um laust starf hjá Hreinir Garðar ehf., hringdi í fyrirtækið og kynnti sig og fékk strax frábær viðbrögð hjá þeim sem svaraði: „Ert þú Hreinn Garðar? Þú verður að vinna hérna.“
Aðspurður segir hann að honum líki mjög vel í vinnunni og spurður að því hvort hann sjái fram á það að vinna hjá fyrirtækinu í framtíðinni stendur ekki á svari. „Alveg örugglega, ég er bara eins og kóngurinn í ríkinu, allir vita nafnið mitt.“