Myrkvi er dúó sem samanstendur af Magnúsi Thorlacius og Yngva Holm. Þetta er fyrrum sólóverkefni Magnúsar og rökrétt framhald hljómsveitarinnar Vio þar sem meðlimirnir gerðu áður garðinn frægan. Þegar hljóðheimasmiðurinn Yngvi gekk til liðs við Myrkva var eldri hljómsveitin lögð á hilluna.
Sjá einnig: Draumabyrjun: Nýja árið tekið í nefið
Self-Pity er gítardrifið tundurskeyti sem sækir innblástur í upphaf aldarinnar. Skammdegið, hugsýkin og bölsýnin eru sprengd upp á yfirborðið með þessari tveggja og hálfs mínútna bombu.
Þetta er önnur smáskífan af komandi breiðskífu Myrkva og Yngva Holm en þeir kumpánar hafa ýmsa fjöruna sopið í gegnum tíðina. Týndu árin og hljóðheimur uppvaxtaráranna, sitt hvorum megin við aldamótin, brutust út við gerð plötunnar.
