Breska svartmálms sveitin Cradle of Filth hafa verið sakaðir um að vera hryðjuverkamenn. Ástæðan er sú að þeir frestuðu tónleikum sínum í ísraelsku borginni Tel Aviv sem áttu að fara fram þann 10. febrúar næstkomandi.

„Cradle of Filth tilkynna frestun á tónleikum sínum í Tel Aviv. Ekki vegna neinnar tengingar við hryðjuverkasamtök eins og sumt fólk á Facebook hefur haldið fram heldur vegna leiðbeininga frá ríkisstjórn lands sem meðlimur sveitarinnar kemur frá. Að ekki sé óhætt að ferðast til svæðisins. Einnig vegna þess að tryggingafélög vilja ekki tryggja hljómsveitina spili hún á þessum stað á þessum tíma og erfiðleika með að koma búnaði til lands sem á í stríði,“ segir í tilkynningu hljómsveitarinnar.

Cradle of Filth er ein stærsta svartmálmssveit heims, stofnuð í Suffolk í Bretlandi árið 1991. Í dag eru hins vegar einnig meðlimir frá Bandaríkjunum og Tékklandi í sveitinni. En bandarísk stjórnvöld hafa varað þegna sína við ferðalögum til Ísraels.

„Við skiljum alvarleika ástandsins í Ísrael og Gasaborg á þessari stundu og biðjumst afsökunar til allra aðdáenda okkar að þurfa að fresta tónleikunum,“ segir í tilkynningunni. Ákvörðunin sé þó í raun ekki í þeirra höndum. Ekki frekar en þegar hljómsveitin ákvað að fresta tónleikaferð til Rússlands á síðasta ári vegna innrásarinnar í Úkraínu.