Vinkonurnar Lína Birgitta Sigurðardóttir, athafnakona og áhrifavaldur, Gurrý Jónsdóttir, snyrtifræðingur og áhrifavaldur, og Sólrún Diego, áhrifavaldur og skipulags- og þrifsérfræðingur, halda úti hlaðvarpinu Spjallið.

Þær hafa tilkynnt yfirvofandi breytingar á hlaðvarpinu og munu frá og með 1. október bjóða aðdáendum að kaupa áskrift.

Með því komast þær í hóp hlaðvarpskónganna sem bjóða upp á áskrift, eins og Auddi, Steindi og Gillz með Blökastið, Sölvi Tryggvason og Frosti Logason með hlaðvarpsveituna Brotkast.

Vinkonurnar útskýra nýja fyrirkomulagið í nýjasta þætti af Spjallið. Þær segja að þættirnir verða öðruvísi og mega hlustendur búast við jákvæðum og skemmtilegum breytingum. Áskrifendur fá þrjá þætti á mánuði og það verður einn auka þáttur á mánuði sem verður aðgengilegur öllum. Þær segja að áskriftin sé tilvalin fyrir harðasta aðdáendahóp þeirra og lofa miklu fjöri. Til að mynda verður fyrsti þátturinn tekinn í beinni frá Barcelona.

Þær munu koma til með að auglýsa skráningu á samfélagsmiðlum þegar nær dregur en nýja fyrirkomulagið tekur gildi 1. október.

„Ég veit líka að við verðum opnari og heimilislegri,“ sagði Lína Birgitta þegar þær stöllur tilkynntu um yfirvofandi breytingar.

„Meira bara svona látum allt flakka, þetta er áskrift og lokaður hópur. Við ætlum að gera smá breytingu þannig fólk fái meira úr því að vera í áskrift,“ sagði Sólrún.

„Það verða afslættir og stemning,“ sagði Gurrý