Beast, nýjasta kvikmynd leikstjórans Baltasars Kormáks Baltasarssonar, var frumsýnd á dögunum en sýningar á myndinni hér á landi hefjast í næstu viku. Stórstjarnan Idris Elba fer með aðalhlutverkið í myndinni sem fjallar um fjölskyldu þar sem foreldrarnir eru skilin. Þegar konan fellur frá ákveður söguhetjan að fara með dætrum sínum tveimur til þorpsins í Afríku þaðan sem móðir þeirra er en hún hafði lofað dætrum sínum að fara þangað. Ferðin reynist þó ekki áfallalaus þar sem ljón eitt á eftir að gera fjölskyldunni erfitt fyrir.

Elba var á dögunum í viðtali við útvarpsþáttinn Breakfast Club og ræddi hann þar um myndina. Á meðal þess sem hann ræddi er hvernig valið var í hlutverk dætra hans í myndinni en Isan Elba, dóttir leikarans, fór í prufu til að leika dóttur hans í myndinni. Elba sagði í viðtalinu að þrátt fyrir að dóttir hans hafi staðið sig frábærlega í prufunni þá hafi Baltasar ekki viljað fá hana til að leika hlutverk dótturinnar í myndinni.

Ástæðan fyrir því að Isan fékk ekki hlutverkið er sú að samband Isan og Idris passaði ekki fyrir sambandið sem feðginin í myndinni áttu að vera með. Will Packer, framleiðandi myndarinnar, var einnig í útvarpsþættinum en hann sagði að Idris hafi verið skýr varðandi prufu dóttur sinnar. „Idris var í prufunni með henni, hann var mjög harður við hana. Hann sagði við mig: Þegar öllu er á botninn hvolft þá erum við að fara að taka bestu ákvörðunina fyrir myndina. Ég treysti þér Will og ég treysti leikstjóranum.“

Það var Will Packer sem lét Isan vita að hún hefði ekki fengið hlutverkið en hún brást ekki vel við því. Samkvæmt Idris þá talaði Isan, sem er 20 ára gömul, ekki við hann í um þrjár vikur eftir að hún fékk símtalið frá Will. Þau náðu þó sáttum að lokum og þá sagði Isan að hún væri þakklát að hafa fengið tækifæri til að fara í prufuna.

„Við komumst í gegnum þetta og ég er mjög stoltur af henni að fara í gegnum allt þetta, fá ekki hlutverkið en mæta svo samt á frumsýninguna,“ sagði Idris.

Hægt er að horfa á þáttinn í heild sinni hér fyrir neðan: