Japanskur maður að nafni Toko segir að nú sé draumur hans um að verða fjórfætt dýr loksins uppfylltur. Toko er ekki raunverulega búinn að breyta sér í dýr en hann er búinn að kaupa afar raunverulegan hundabúning. Búningurinn kostaði alls tvær milljónir japanskra jena, sem gera rétt rúmlega tvær milljónir í íslenskum krónum.
Maðurinn pantaði búninginn hjá fyrirtækinu Zeppet en alls tók það fyrirtækið 40 daga að búa til búninginn. Afraksturinn er sá að þegar Toko klæðist búningnum þá líkist hann mjög Collie hundi með alltof langa fætur.
„Ég valdi Collie tegundina því þannig er búningurinn raunverulegur þegar ég er í honum. Ég hugsaði að stórt dýr sem er svipað mér í stærð væri gott – þar sem ég vildi fá raunverulegan búning,“ segir Toko með myndum sem hann birti á netinu.
Þá hefur Toko einnig birt myndband af sér í búningnum og voru netverjar með mismunandi skoðanir á búningnum. Einhverjir hrósuðu honum og sögðu að hann væri frábær en aðrir sögðu að hann væri ónáttúrulegur. „Það er sama hvað þú eyðir miklum peningum, þú verður aldrei raunverulegur hundur,“ segir til að mynda einn netverji um búninginn.
Toko virðist þó vera afar ánægður með búninginn. Hann þakkar fyrirtækinu sem framleiddi hann með myndbandi sem hann birti af sér í búningnum á Twitter. Í því sést hann rúlla sér um á gólfinu í búningnum,
„Ég pantaði búning! Þökk sé ykkur gat ég uppfyllt draum minn um að verða að dýri!“