Leikkonan Margot Robbie átti stórleik í The Wolf of Wall Street, kvikmynd Martin Scorsese um auðjöfurinn Jordan Belfort sem kom út árið 2013. Ein sena í kvikmyndinni vakti töluverða athygli á sínum tíma en í henni er Margot Robbie allsnakin að leika á móti Leonardo Di Caprio, sem fór með aðalhlutverkið í myndinni.
Robbie var sérstakur gestur á BAFTA hátíðinni í ár en á hátíðinni ræddi leikkonan um senuna þar sem hún var nakin. Hún segir að hún hafi þurft að leita í áfengi áður en senan var tekin upp. „Ég er ekki að fara að ljúga, ég fékk mér nokkur skot af tekíla fyrir þessa senu því ég var stressuð, mjög, mjög stressuð,“ sagði hin 32 ára gamla Robbie en hún var aðeins 22 ára gömul þegar hún lék hlutverk Naomi Lapaglia, eiginkonu Belfort í myndinni.
„Ég veit að þetta hljómar ótrúlega kjánalega núna því myndin varð svo vinsæl en á þessum tíma hugsaði ég með mér að enginn myndi taka eftir mér í þessari mynd,“ sagði Robbie einnig. Hún sagðist hafa hugsað að það myndi ekki skipta máli hvað hún gerði í myndinni því allir væru með augun á DiCaprio.