Lífsstílsþátturinn Matur og heimili, í umsjón Sjafnar Þórðar, er á dagskrá Hringbrautar í kvöld kl. 19 og endursýndur kl. 21. Að þessu sinni heimsækir Sjöfn 20&SJÖ Mathús & bar, veitingastað sem hefur komið á óvart með einstakri matargerð og hefðum.
Veitingastaðurinn er staðsettur í Víkurhvarfi í Vatnsendahverfinu í Kópavogi þar sem við blasir himneskt útsýni yfir Elliðavatn og til fjalla. Boðið er upp á fjölbreyttan matseðil og þar gætir áhrifa frá löndum við Miðjarðarhafið og Bandaríkjunum en sumir réttirnir eiga uppskriftir sínar að rekja til frægra staða eins og Katz´s Delicatessen í New York svo fátt sé nefnt.
Þeir Björn Jóhannsson, landslagsarkitekt hjá Urban Beat, og Hörður Lúthersson, verkstjóri hjá Garðaþjónustunni, sýna Sjöfn útkomuna á draumagarði sem þeir hafa unnið að í sumar. Um er að ræða annan draumagarðinn af þremur sem Sjöfn kynnir sér.
Í hönnuninni og framkvæmdinni er komið til móts við óskir eigenda um stækkun á heimili út í garð, auka nýtinguna og bjóða uppá fjölbreytta útiveru, þar sem skjólveggir eru til mynda með gleri þannig að útsýni innan garðs og utan njóti sín til fullnustu. Tröppur til að setjast í og fegra með fallegum blómakerum og úthugsaða staðsetningu fyrir útieldhús og grill. „Hér er fagurfræðin og notagildið í góðu jafnvægi og svæðin kringum allt húsið hafa hlutverk,“ segir Björn og er alsæll með útkomuna á verkinu.
„Okkur tókst að leysa öll verkefni vel að hendi í þessum garði og með því að fá Björn á staðinn vikulega gátum við strax tekið á öllum vafaatriðum og fundið bestu leiðirnar til að leysa óvæntar áskoranir,“ segir Hörður sem er ánægður með árangursríkt samstarf við hönnuðinn og eigendur við framkvæmdina á garðinum. Svo er nóg rými til að blása til heljarinnar garðveislu með öllu.
Sem fyrr segir er þátturinn á dagskrá Hringbrautar kl. 19 og 21 í kvöld.