Tvíhöfðabræðurnir Sigurjón og Jón grilluðu frambjóðendur til Alþingiskosninganna með ýmsum persónulegum spurningum í þættinum Vikan með Gísla Marteini á RÚV.
Meðal annars voru frambjóðendur spurðir hvort þeir hefðu prófað eiturlyf, eða ólögleg fíkniefni. „Ég vona að börnin mín séu ekki að horfa,“ sagði Þorgerður Katrín Gunnarsdóttir, formaður Viðreisnar, og sagði jafnframt: „Stutta svarið er já.“
„Já, það hef ég gert,“ sagði Halldóra Mogensen, þingmaður Pírata. Hún vildi síðan ekki fara nánar út í það og sagði nei þegar hún var spurð hvort hún mælti með einhverju sérstöku.
Logi Einarsson, formaður Samfylkingarinnar, sagðist hafa prófað kannabis. „Ég var býsna lélegur hassreykingamaður, það hentaði mér betur að drekka brennivín í kók.“
Glúmur Baldvinsson, oddviti Frjálslynda lýðræðisflokksins, sagðist hafa prófað kannabis.
Meðal þeirra sem sögðust aldrei hafa prófað fíkniefni voru Inga Sæland, formaður Flokks fólksins, Katrín Jakobsdóttir forsætisráðherra og Ásmundur Einar Daðason, félags- og barnamálaráðherra.
Bjarni Benediktsson, fjármálaráðherra og formaður Sjálfstæðisflokksins, sagðist hafa prófað kannabis. „Ég hef tekið smók, það var á háskólaárunum, en það var nú ekki meira en það,“ sagði Bjarni en viðurkenndi að hann hefði tekið smókinn ofan í sig.
Þess má geta að DV spurði Bjarna Benediktsson sömu spurningar árið 2017 og sagði hann þá nei, hann hefði ekki prófað kannabis. Sjá hér.
