Breski fjölmiðlamaðurinn Piers Morgan er allt annað en sáttur með viðtal bretaprinsins Harry og eiginkonu hans Meghan Markle en viðtalið var sýnt í Bandaríkjunum í gær. Viðtalið verður sýnt í Bretlandi í kvöld en fjölmiðlar þar í landi hafa fjallað mikið um viðtalið í dag. Þá virðist vera sem fólk í Bretlandi tali ekki um annað en viðtalið í dag.
Morgan, einn umsjónarmanna þáttarins Good Morning Britain sem sýndur er á ITV, var ansi heitt í hamsi þegar hann talaði um viðtalið í dag. „Ég er svo reiður að ég gæti sprungið. Mér er óglatt eftir það sem ég er búinn að sjá,“ sagði hann. „Þetta er tveggja tíma maraþon af fúkyrðum um konungsfjölskylduna okkar og allt sem drottningin hefur gert og það á meðan Philip prins liggur á sjúkrahúsi.“
Eitt af því sem vakti reiði Morgan voru ummæli Markle um húðlit sonar síns, Archie. Markle vildi meina að Archie yrði bannað að verða prins eftir að konungsfjölskyldan hafi velt því fyrir sér hversu dökk húðin hans yrði. „Þau eru nokkurn veginn að segja að konungsfjölskyldan sé hópur af fólki með hvíta kynþáttahyggju með þessari rasísku sprengju.“
Þá talaði Markle líka um það hvernig henni leið þegar þau bjuggu með konungsfjölskyldunni. Hún sagði til að mynda frá því að hún hafi verið með sjálfsvígshugsanir og að Harry hafi bjargað henni. „Ég trúi ekki orði af því sem hún segir, Meghan Markle. Ég myndi ekki trúa veðurfréttunum ef hún læsi þær.“
