Eluned Anderson, eða Ellie eins og hún er kölluð, er 21 árs námsmaður frá Cardiff í Bretlandi. Hún deilir fallegri mynd af sér á Twitter þar sem hún brosir breitt til myndavélarinnar. Myndin var tekin þegar hún fór út að borða með kærastanum sínum. En sannleikurinn á bak við myndina er sá að fimm dögum áður reyndi hún að svipta sig lífi.
Hún deilir myndinni á Twitter til að sýna að fólk í sjálfsvígshugleiðingum ber það ekki endilega utan á sér.
I attempted suicide 5 days before this photo was taken.
Suicide doesn’t have a look. https://t.co/7I8ihhUkFc pic.twitter.com/DzYdbmizlt
— Ellie (@ElunedAnderson) March 11, 2021
„Ég var að fara í gegnum mjög erfiða tíma. Þetta versnaði til muna í október í fyrra og ég varð fyrir miklu netníði. Ég var að fá skilaboð á Twitter þar sem fólk var að segja mér að drepa mig og einn maður sendi mér þrenn skilaboð með nákvæmum lýsingum um hvernig hann ætlaði að nauðga mér,“ segir hún í samtali við Daily Mail.
„Þetta var mjög fljótfærnisleg hugmynd. Það tók allan minn mátt að telja mér trú um að þetta væri rangt og ég ætti ekki að fylgja þessu eftir. Það sem stoppaði mig var tilhugsunin um ástvini mína.“
Ellie segir að hún hafi skammast sín eftir sjálfsvígstilraunina. Hún sagði engum hvernig sér liði og faldi sig uppi í rúmi. Hún byrjaði einnig að skaða sig sjálfa. En þrátt fyrir allt, í lok vikunnar, þá setti hún á sig grímu og fór út að borða eins og lét eins og allt væri í himnalagi.
Ellie tengir þetta við erfiða æsku. „Okkur var kennt að við mættum ekki segja neinum frá því sem var í gangi heima þegar við vorum yngri. Ég þurfti að læra að setja upp grímu því hvað annað var í boði? Ég þurfti að setja upp bros, fara í kjól og setja á mig farða. Því hinn valkosturinn var þunglyndi og að vera ekki hérna.“
Þetta var önnur sjálfsvígstilraun Ellie, hún reyndi fyrst að svipta sig lífi þegar hún var þrettán ára. Sú tilraun mistókst og sagði Ellie engum frá því.
Ástæðan fyrir því að Ellie ákvað að stíga fram með sögu sína er til að sýna þeim sem efast um sannleiksgildi frásagnar Meghan Markle, um að hún hafi glímt um tíma við sjálfsvígshugsanir, að fólk sem glímir við andleg veikindi ber það ekki endilega utan á sér. Ellie segir að fólk hafi einhverja fyrirfram ákveðna hugmynd um hvernig þeir sem glíma við andleg veikindi eiga að líta út, en það er fjarri því að vera rétt.
Ef sjálfsvígshugsanir gera vart við sig er hægt að hringja í Hjálparsíma Rauða Krossins 1717 og netspjall 1717.is. Einnig er hægt að hafa samband við Píetasímann 552-2218 og/eða tala við hjúkrunarfræðing á netspjalli heilsuvera.is. Það er hægt að lesa nánar um forvarnir gegn sjálfsvígum á vef Landlæknis.