Varla hefur farið framhjá neinum að sænska hljómsveitin ABBA hefur snúið aftur og gaf nýlega út sína fyrstu plötu í fjörutíu ár. Platan heitir ABBA Voyage og verður henni fylgt eftir með tónleikaröð í formi sýndarveruleika á næsta ári.

ABBA-liðar eru þó á fullu að kynna nýju plötuna og var til að mynda stofnuð sérstök Facebooksíða fyrir hana. Nafn hljómsveitarinnar er sem kunnugt er sett saman úr upphafsstöfum meðlimanna sem eru þau Benny Anderson, Björn Ulvæus, Agnetha Fältskog og Anni-Frid Lyngstad. ABBA sló eftirminnilega í gegn með laginu Waterloo í Eurovision árið 1974 og lagði heiminn að fótum sér.

Á dögunum mátti þar sjá myndband þar sem Björn og leikarinn góðkunni Ian McKellen sátu að prjóna og með fylgdi jólakveðja til áhorfenda.

Báðir voru þeir klæddir fallegum prjónapeysum en það sem færri vita er að peysan sem McKellen klæðist er eftir uppskrift frá Guðmundu Dagbjörtu Guðmundsdóttur sem rekur Litlu Prjónabúðina í Faxafeni. Hún er einnig iðin við að prjóna og hanna uppskriftir.

Það kom henni skemmtilega á óvart þegar hún rakst á myndbandið og sá sjálfan Ian McKellen í peysu eftir uppskriftinni hennar.

„Uppskriftin heitir Heljargjá og ég hef ekki hugmynd um hvernig Ian McKellen eignaðist eintak af henni. Það geta auðvitað allir prjónað sér eintak þar sem það er til uppskrift af peysunni bæði á ensku og íslensku. Ég get ekki sagt að ég haldi uppá ABBA, er með lítið þol fyrir diskótónlist en ef ég myndi hlusta á einhverja diskótónlist myndi ég sennilega velja þau. En ég er hins vegar aðdáandi Ian Mckellen. Hver elskar ekki Gandalf? Ég fékk smá veruleikafirringu við að sjá hann í Heljargjá, fannst þetta eitthvað svo óraunverulegt,“ segir hún.

Áhugasöm geta keypt uppskriftina að Heljargjá hér á Ravelry.