Kvikmyndin Dýrið eða Lamb eins og hún heitir erlendis verður sýnd á 600 tjöldum í Bandaríkjunum.
„Aldrei áður hefur íslensk kvikmynd fengið jafn mikla almenna dreifingu vestanhafs sem segir allt um það hversu mikla trú A24, dreifingaraðili myndarinnar hefur á myndinni,“ kemur fram í fréttatilkynningu um myndina.
Myndin opnar á sama degi og James Bond en A24 dreifingaraðilar Dýrsins í Bandaríkjunum eru vissir um að myndin fá góða aðsókn og muni höfða til hóps yngri áhorfenda í Bandaríkjunum en þeirra sem sækja Bond myndirnar.
„Við vitum að kvikmyndin Dýrið/Lamb er einstök perla, aðgengileg, sorgleg og fyndin. Viðbrögðin á forsýningum hafa staðfest það og yfir tíu milljónir hafa horft á kynningarstikluna. Myndin hefur alla burði til að slá í gegn hér í Bandaríkjunum og við erum ofboðslega spennt fyrir því að frumsýna hana svona stórt,“ segir David Laub hjá A24.
Dýrið er sýnd í Smárabíói, Háskólabíói og Borgarbíó Akureyri.
Stiklan hefur vakið þó nokkra athygli og hefur fengið tæplega sex milljónir í áhorf. Sjáðu hana hér að neðan.
