Scott Disick, barnsfaðir áhrifavaldsins Kourtney Kardashian, er ekkert hoppandi kátur með trúlofun Kourtney og tónlistarmannsins Travis Barkers. Nú hefur erlenda slúðurpressan greint frá því að Scott neiti að vera í sama herbergi og Travis og hafi þess vegna forðast fjölskylduhittinga Kardashian-fjölskyldunnar undanfarið. Að sögn heimildarmanna er Scott að eiga erfitt með að sætta sig við að barnsmóðir hans sé trúlofuð öðrum og er nú að taka sér smá tíma fjarri Kardashian-fjölskyldunni til að sætta sig við aðstæður.

Samkvæmt heimildarmanni US weekly þá hefur Scott ekki átt sjö daganna sæla undanfarið. Hann kæri sig ekki um að vera í kringum unnusta Kourtney og sé óöruggur um stöðu sinnan innan Kardashian-fjölskyldunnar.

„Kardashian-fjölskyldan dýrkar Scott og hafa sagt honum að hann sé hluti fjölskyldunnar sama hvað, en honum finnst hann samt hafa fjarlægst þau og finnst hann vera meira utangarðs en nokkru sinni áður.“

Þrátt fyrir að Scott og Kourtney hafi slitið sambandinu sínu fyrir þó nokkru síðan hefur þeim samt verið vel til vina og hefur Scott yfirleitt verið fengið að fljóta með í flest fjölskylduferðalög og mætt á flestar samkomur fjölskyldunnar, en nú er annað hljóð í Scott.

„Hann forðast fjölskylduhittinga sem Travis mætir á, og hann hefur stundum neitað að vera í sama herbergi og hann. Það má með sanni segja að hátíðirnar á þessu ári verði erfiðar og að slegist verði um börnin.“

Að sögn slúðurpressunnar hefur Scott verið „gjörsamlega miður sín“ síðan hann frétti af trúlofuninni og samkvæmt heimildum People er Scott núna að taka sér tíma til að melta fréttirnar.

„Scott hefur ekki viljað horfast í augu við samband Travis og Kourtney því honum fannst hann ekki þurfa þess,“ sagði heimildarmaðurinn sem bætti við að Scott hafi ekki tekið samband sinnar fyrrverandi alvarlega og taldi að það myndi bara renna sitt skeið á skömmum tíma.

„En það gerðist ekki og nú þarf hann að horfast í augu við þetta sem er óþægilegt. hann veit að hann þarf að takast á við þetta þrátt fyrir óþægindin og komast yfir þetta. Hann veit að það er ekki hlutverk Kourtney eða Travis að hugga hann. Það er undir honum komið og ef hann ætlar að ala upp börn sín með Kourtney, sem hann hefur gert hingað til, þá verður hann að sætta sig við þetta.“

Scott eigi sérstaklega erfitt með þetta þar sem hann stóð alltaf í þeirri trú að hann og Kourtney myndu taka aftur saman á endanum.

Sjá einnig: Scott Disick er að „missa vitið“ yfir trúlofun Kourtney Kardashian