Kraftaverkamaðurinn Guðmundur Felix Grétarsson, sem gekkst undir ágræðslu á báðum handleggjum janúar síðastliðnum, birti myndband á Facebook-síðu sinni í morgun þar sem hann gerir grein fyrir stöðu mála.
Nú eru liðnir níu mánuðir síðan Guðmundur Felix lagðist undir hnífinn í frönsku borginni Lyon og hefur bataferlið gengið vonum framar. Greinir Guðmundur Felix frá þeim ánægjulegu tíðindum að framfararnir hafi verið hraðari en læknar þorðu að vona.
„Fyrir þau ykkar sem sáuð myndbandið mitt í maí þá gat ég hreyft tvíhöfðann lítillega. En núna get ég gert dálítið meira en það. Hann virkar nokkuð vel og styrkurinn í öxlunum, tvíhöfðanum og þríhöfðanum eykst dag frá degi,“ segir Guðmundur Felix. Þá greinir hann frá því að hann finni fyrir kulda og snertingu ef þrýst er á á hægri handlegginn.
Þróunin er þó aðeins hægari vinstra megin en Guðmundur Felix segir að við því hafi mátt búast.
„Taugarnar vinstra megin eru að vaxa og ég er kominn með taugar fram í höndina. Ég get hreyft öxlina lítillega en hún er fjári þung,“ segir hann og tekur fram að axlarvöðvarnir séu frá gjafanum.
Þrátt fyrir það eru framfararnir hraðari en læknar þorðu að vona. Í dag er Guðmundur Felix farinn að geta hreyft fingur hægri handar lítillega en það er eitthvað sem læknar töldu að myndi ekki gerast fyrr en tveimur árum eftir aðgerðina. Guðmundur sýnir svo áhorfendum smá tilraun og tekur upp klementínubát, stingur upp í sig og er ansi hróðugur yfir afrekinu.