Áhorfendur breska raunveruleikaþáttarins Dancing On Ice voru í áfalli síðastliðið sunnudagskvöld vegna klæðnaðar Holly Willoughby, kynnis þáttarins. Þeim þótti kjóllinn of fleginn fyrir fjölskylduþátt.
Þetta er ekki í fyrsta sinn sem Holly hefur vakið slíka athygli fyrir klæðaburð. Árið 2013 baðst hún afsökunar á kjól sem hún klæddist í úrslitaþætti The Voice, tæplega 140 manns kvörtuðu undan klæðnaði hennar.
Hún er ekki eina stjarnan sem hefur fengið kvörtun. The Sun tók saman sjónvarpsklæðnað stjarnanna sem hefur fengið flestar kvartanir í bresku sjónvarpi.
Amanda Holden klæddist mjög flegnum kjól í Britain‘s Got Talent árið 2017. Áhorfendum bauð svo við kjólnum að yfir 663 manns lögðu fram formlega kvörtun. Amanda sagði viðbrögð áhorfenda vera „móðursýkisleg“.
Söngkonan Nicole Scherzinger klæddist svörtum gegnsæjum búningi í lokaþætti X Factor árið 2019. Yfir 400 manns kvörtuðu undan klæðnaði hennar, eða kannski fremur undan klæðaskorti.
Jennifer Lopez er ekki þekkt fyrir að vera feimin þegar kemur að klæðavali og klæðist hverjum glæsilegum búningi á fætur öðrum. En klæðnaður hennar í Britain‘s Got Talent árið 2013 vakti mikla reiði.
Jennifer klæddist leðursamfellu, netasokkabuxum og háum leðurstígvélum. Á einum tímapunkti í sýningunni renndi J.Lo sér klofvega fram á sviðinu og þótti mörgum þeir sjá aðeins of mikið af klofi hennar.
Það bárust yfir 100 kvartanir sólarhringinn eftir að þátturinn fór í loftið. Jennifer baðst hins vegar ekki afsökunar og stóð með búningnum. Hún sagðist hafa klæðst sama búningi á Billboard-verðlaunahátíðinni, nema í rauðu. „Þá virtist hann ekki valda neinum vandræðum, þannig mér fannst ég örugg,“ sagði hún.
Klæðnaður Christinu Aguileru og Rihönnu í lokaþætti X Factor árið 2010 olli svakalegu hneyksli. Yfir 3500 manns kvörtuðu undan klæðnaði þeirra.
